Kids: చిన్నారుల ఏడుపు వెనకున్న సమస్యలేంటో తెలుసా!

ఇంటర్నెట్‌ డెస్క్‌: పిల్లలకు ఏ మాత్రం అసౌకర్యంగా అనిపించినా తట్టుకోలేరు. వాళ్లకి ఏ సమస్య ఉందో చెప్పలేరు. పిల్లలకు ఉన్న ఏకైక అస్త్రం వాళ్ల ఏడుపే! దీంతో వాళ్లకి ఎలాంటి ఇబ్బంది ఉన్నా ఏడ్చేస్తుంటారు. మరి ఏడుపు వెనక ఉన్న సమస్యేంటో తెలుసుకోవాలంటే ఎలా!

* పిల్లలకు తరచూ కడుపు నొప్పి వస్తుంటుంది. దీనికి కారణాలు అనేకం.

* పిల్లలకు డబ్బా పాలు పడుతున్నారా! అయితే జాగ్రత్తలు తప్పనిసరి అంటున్నారు.. నిపుణులు! కొనేముందు నాణ్యత ప్రమాణాలు చూసుకోవటం ఉత్తమం. 

* కొంతమంది తల్లులు పిల్లలు ఏడ్చారంటే చాలు.. పాలు పడుతుంటారు. కానీ వాళ్లకు ఇతరత్రా సమస్య ఏదైనా ఉంటే మీరు పాలు పట్టినా ప్రయోజనం ఉండదు. అందువల్ల మొదట బిడ్డ ఏ సమస్యతో బాధ పడుతున్నాడో తెలుసుకోవాలి.  

* పిల్లలకు పాలు పట్టిన వెంటనే పడుకోబెట్టడం, ఆడించడం చేయకూడదు. ఇలా చేయడం వల్ల పిల్లలు వాంతులు చేసుకుంటారు. అందువల్ల కాసేపు వాళ్లని భూజాన వేసుకోండి. దీంతో పిల్లలకు పాలు చక్కగా జీర్ణమవుతాయి. 

* పిల్లలకు ప్రశాంతమైన వాతావరణంలో పాలు పట్టాలి. చుట్టూ గొడవలు, అల్లర్లు ఉంటే పిల్లలకు పాలు ఒంటపట్టవట! చుట్టూ గందరగోళ వాతావరణం ఉంటే పిల్లలు భయపడతారు. ఏడుస్తారు. అందువల్ల పిల్లలు సానుకూల వాతావరణంలో పెరిగేలా జాగ్రత్తలు తీసుకోండి.  

* పిల్లలకు నిద్ర వచ్చినా ఏడుస్తుంటారు. వారి పరిస్థితిని గమనించి పడుకోబెట్టాలి.

* పిల్లలకు వాడే దుస్తులు శుభ్రంగా ఉండాలి. ఎప్పటికప్పుడు దుప్పట్లు, టవల్స్‌ మారుస్తూ ఉండాలి.