Medaram: మేడారం మహాజాతరలో తొలి ఘట్టం.. గద్దెపైకి చేరుకున్న సారలమ్మ

మేడారం: మేడారం మహాజాతరలో తొలి ఘట్టం ఆవిష్కృతమైంది. వనమంతా జనమైన వేళ.. ఆ జనం మధ్యకే వచ్చి వనదేవతలు కొలువుదీరారు. డోలు వాయిద్యాల మధ్య కోలాహలంగా.. కన్నెపల్లి నుంచి బయలుదేరిన సమ్మక్క కుమార్తె సారలమ్మ మేడారానికి చేరుకుంది. భక్తుల జయజయధ్వానాల మధ్య సారలమ్మ, పగిడిద్దరాజు, గోవిందరాజు గద్దెలపైకి చేరుకున్నారు. ఈ సందర్భంగా సారలమ్మకు మంత్రి సీతక్క, జిల్లా కలెక్టర్‌, ఎస్పీ సాదర స్వాగతం పలికారు. సారలమ్మ రాక నేపథ్యంలో భద్రతా బలగాలు పటిష్ట బందోబస్తును ఏర్పాటు చేశాయి. అంతకు ముందు కన్నెపల్లి గ్రామస్థులైన ఆడపడుచులు సారలమ్మ ఆలయాన్ని ముగ్గులతో అందంగా అలంకరించారు. వనదేవతల రాక సందర్భంగా భక్తులతో మేడారం కిటకిటలాడుతోంది. గురువారం సాయంత్రం సమ్మక్క తల్లి గద్దెపైకి చేరుకోనున్నారు. శుక్రవారం వనదేవతలు అందరూ గద్దెలపై నుంచి భక్తులకు దర్శనమివ్వనున్నారు.