Botsa Satyanarayana: ఉపాధ్యాయులకు బోధన తప్ప మరో పని చెప్పబోం: మంత్రి బొత్స

అమరావతి: రాష్ట్రంలోని ఉపాధ్యాయులకు బోధన తప్ప మరో పని చెప్పబోమని మంత్రి బొత్స సత్యనారాయణ స్పష్టం చేశారు. విద్యా కానుక కిట్ల పంపిణీ వారంలో పూర్తి చేస్తామని చెప్పారు. ఉపాధ్యాయ సంఘాలతో చర్చల అనంతరం ఆయన మీడియాతో మాట్లాడారు. విద్యా వ్యవస్థలో మార్పులపై ఉపాధ్యాయ సంఘాలతో చర్చించామని తెలిపారు. ప్రభుత్వ నిర్ణయాలను ఉపాధ్యాయ సంఘాలకు వివరించామన్నారు. 82 వేలకు పైగా ఉపాధ్యాయులు బదిలీలు కోరారని చెప్పారు.

‘‘రాష్ట్రంలో 679 ఎంఈఓ పోస్టులు భర్తీ చేయాలని నిర్ణయించాం. 350 మంది ప్రధానోపాధ్యాయులకు ఎంఈఓలుగా పదోన్నతి కల్పిస్తాం. ప్రస్తుతం 355 ఉపాధ్యాయ పోస్టులు ఖాళీగా ఉన్నాయి. పాఠశాలల్లో రాత్రి వాచ్‌మెన్‌ పోస్టులను ఇప్పటికే భర్తీ చేశాం. 175 ఇంజినీరింగ్‌ ప్రొఫెసర్లతో టీచర్లకు సాంకేతిక పరిజ్ఞానం కల్పిస్తాం. 98 మంది కంటే తక్కువ సంఖ్య ఉన్న పాఠశాలల్లో సబ్జెక్టు టీచర్లు లేరు. సబ్జెక్టు టీచర్లు లేనిచోట విద్యార్థులను సమీప పాఠశాలల్లో చేర్పించాలి. పది, ఇంటర్‌లో ప్రతిభ కనబరిచినవారికి అభినందన కార్యక్రమాలు నిర్వహిస్తాం. 20వ తేదీన (మంగళవారం) సీఎం చేతుల మీదుగా విజయవాడలో అభినందన కార్యక్రమాలు చేపడుతున్నాం’’ అని బొత్స వివరించారు.