Bandi Sanjay: బండి సంజయ్‌కు ఊరట.. అరెస్టు చేయొద్దని హైకోర్టు మధ్యంతర ఉత్తర్వులు

హైదరాబాద్‌: ఉప్పల్, మేడిపల్లి పోలీస్ స్టేషన్లలో ఇటీవల నమోదైన కేసుల్లో భాజపా నేత బండి సంజయ్‌కు హైకోర్టులో ఊరట లభించింది. ఈనెల 11 వరకు బండి సంజయ్‌ని అరెస్టు చేయవద్దని హైకోర్టు మధ్యంతర ఉత్తర్వులు జారీ చేసింది. విచారణ జరపాల్సి వస్తే సీఆర్‌పీసీ 41ఏ నోటీసు ఇవ్వాలని ఉన్నత న్యాయస్థానం స్పష్టం చేసింది. గత నెల 27న సంజయ్‌పై ఉప్పల్, మేడిపల్లి పోలీస్‌ స్టేషన్లలో నమోదైన కేసులను కొట్టివేయాలని కోరుతూ వేసిన క్వాష్ పిటిషన్‌పై బుధవారం హైకోర్టులో విచారణ జరిగింది. చెంగిచర్లలో జరిగిన గొడవలో గాయపడిన వారిని పరామర్శించేందుకు వెళ్తుంటే పోలీసులు అక్రమ కేసులు బనాయించారని సంజయ్ తరఫు న్యాయవాది వాదించారు. పూర్తి వివరాలతో కౌంటరు దాఖలు చేయాలని పోలీసులను ఆదేశించిన హైకోర్టు.. తదుపరి విచారణను ఈనెల 11కి వాయిదా వేసింది.