vizianagaram: చెక్‌డ్యామ్‌లో ముగ్గురు యువకుల గల్లంతు

జామి: విజయనగరం జిల్లా జామి మండలం జాగరం వద్ద చెక్‌డ్యామ్‌లో ముగ్గురు యువకులు గల్లంతయ్యారు. గోస్తనీ నది చెక్‌డ్యామ్‌కు మంగళవారం ఉదయం ఈత కోసం ఆరుగురు యువకులు వచ్చారు. మొదట ఒకరు మునిగి పోవడంతో రక్షించడానికి ఒకరి తర్వాత మరొకరు నీటిలోకి దిగారు. ఇలా ముగ్గురు గల్లంతు కాగా.. మిగతావారు ఒడ్డుకు చేరుకుని స్థానిక అధికారులకు సమాచారం ఇచ్చారు.

పోలీసులు, అగ్నిమాపక సిబ్బంది రంగంలోకి దిగి గాలింపు చర్యలు చేపట్టారు. గల్లంతైన యువకులను విజయనగరం కంటోన్మెంట్‌కు చెందిన అశోక్‌(19), షాకిత్‌(16), రజిక్‌(14)గా గుర్తించారు. వీరిలో ఒకరి మృతదేహాన్ని వెలికితీశారు. మరో ఇద్దరి కోసం గాలింపు చర్యలు కొనసాగుతున్నాయి. ఈ ప్రమాదానికి చెక్ డ్యామ్‌ దిగువ భాగంలో అక్రమ ఇసుక తవ్వకాలే కారణమని స్థానికులు పేర్కొంటున్నారు.