TSPSC: తెలంగాణ పబ్లిక్‌ సర్వీస్‌ కమిషన్‌లో మరో సభ్యుడి రాజీనామా

హైదరాబాద్‌: తెలంగాణ రాష్ట్ర పబ్లిక్‌ సర్వీస్‌ కమిషన్‌ (TSPSC) లో సభ్యుల రాజీనామా కొనసాగుతోంది. ఇప్పటికే టీఎస్‌పీఎస్సీ ఛైర్మన్ జనార్దన్‌రెడ్డి, కమిషన్‌ సభ్యుడు సత్యనారాయణ రాజీనామా చేశారు. తాజాగా మరో సభ్యుడు కారం రవీందర్ రెడ్డి రాజీనామా చేసినట్టు శుక్రవారం ప్రకటించారు. ఇద్దరు ఉద్యోగుల తప్పిదం కారణంగా టీఎస్‌పీఎస్సీ మనుగడే ప్రశ్నార్థకంగా మారిందంటూ రాజీనామా అనంతరం ఒక ప్రకటనలో రవీందర్‌ రెడ్డి పేర్కొన్నారు. ఆ అపవాదును సంబంధం లేని వారు మోయాల్సి వస్తోందన్నారు. కొంతమంది స్వార్థపూరిత ఆలోచనలకు అనుగుణంగా పనిచేయలేదనే సంస్థలో జరిగిన పరిణామాలను తమకు ఆపాదించారని ఆవేదన వ్యక్తం చేశారు. కమిషన్‌లో సరిపడా సభ్యులు, సిబ్బంది లేకపోయినా.. నిరుద్యోగులకు మంచి జరగాలనే ఉద్దేశంతో నియామక ప్రక్రియను వేగవంతం చేశామని గుర్తు చేశారు. కమిషన్‌పై ఉన్న అపోహలను నిరుద్యోగులు పక్కన పెట్టాలని కోరారు.