Taraka Ratna: తారకరత్న మెదడుకు సంబంధించిన చికిత్స జరుగుతోంది: విజయసాయిరెడ్డి

బెంగళూరు: సినీనటుడు నందమూరి తారకరత్న ఆరోగ్యం నిలకడగానే ఉందని వైకాపా ఎంపీ విజయసాయిరెడ్డి తెలిపారు. బుధవారం బెంగళూరులోని నారాయణ హృదయాలయ ఆసుపత్రికి వచ్చిన ఆయన.. తారకరత్న ఆరోగ్యంపై కుటుంబ సభ్యులతో మాట్లాడారు. అనంతరం మీడియాతో మాట్లాడుతూ.. ఆసుపత్రి సిబ్బంది మంచి వైద్య సేవలందిస్తున్నారని తెలిపారు. తారకరత్న గుండెతో పాటు ఇతర అవయవాలు బాగున్నాయని, మెదడుకు సంబంధించిన చికిత్స జరుగుతోందని వెల్లడించారు. త్వరగా కోలుకుంటారని ఆశిస్తున్నట్టు చెప్పారు. బాలకృష్ణ దగ్గరుండి వైద్య సేవలు చూసుకుంటున్నారని విజయసాయిరెడ్డి తెలిపారు.