Expressway: 100 గంటల్లో 100 కి.మీ రహదారి నిర్మాణం!

దిల్లీ: ఉత్తర్‌ప్రదేశ్‌లోని ఘజియాబాద్‌ - అలీగఢ్‌ ఎక్స్‌ప్రెస్‌ హైవే నిర్మాణం రికార్డు సృష్టించింది. కేవలం 100 గంటల్లో 100 కి.మీ పొడవైన పొడవైన రహదారిని నిర్మించినట్లు జాతీయ రహదారులు, రోడ్డు రవాణాశాఖ అధికారిక ప్రకటన విడుదల చేసింది. ఈ సందర్భంగా రహదారి మౌలిక సదుపాయాల పరిశ్రమ అంకితభావాన్ని ప్రశంసించింది. రహదారి నిర్మాణంలో పాలు పంచుకున్న వారిని అభినందించేందుకు నిర్వహించిన కార్యక్రమంలో కేంద్రమంత్రి నితిన్‌ గడ్కరీ వర్చువల్‌గా పాల్గొన్నారు. ఈ సందర్భంగా ఆయన మాట్లాడుతూ.. ఎన్‌హెచ్‌34లో ఘజియాబాద్‌-అలీగఢ్‌ మధ్య 118 కి.మీ పొడవైన మార్గం ఎంతో కీలకమని, జనసాంద్రత ఎక్కువగా ఉన్న ఈ ప్రాంతాలను అనుసంధానం చేయడంలో కీలక పాత్ర పోషిస్తుందని అన్నారు.

ఉత్తర్‌ప్రదేశ్‌లోని దాద్రి, గౌతమ్‌ బుద్ధ్‌ నగర్‌, సికందర్‌బాద్‌, బులంద్‌ షహర్‌, కుర్జా తదితర పట్టణాలను కలుపుతూ ఈ రహదారి వెళ్తుండటం కలిసొచ్చే అంశమని గడ్కరీ తెలిపారు. వర్తక నిర్వహణకు ఈ రహదారి కీలకంగా పని చేస్తుందని వ్యవసాయ, పారిశ్రామిక ప్రాంతాలను కలుపుతూ.. ప్రాంతీయ ఆర్థికాభివృద్ధికి దోహదం చేస్తుందని గడ్కరీ అన్నారు. ఈ రహదారి నిర్మాణంలో వినూత్నంగా గ్రీన్‌ టెక్నాలజీని వినియోగించినట్లు చెప్పిన నితిన్‌ గడ్కరీ.. దాదాపు 90 శాతం మిల్లింగ్‌ మెటీరియల్‌ను ఉపయోగించినట్లు తెలిపారు. దీనివల్ల రహదారి నిర్మాణ సమయంలో పర్యావరణానికి హాని కలిగించే ఉద్గారాలను గణనీయంగా తగ్గించినట్లు చెప్పారు.