Maharashtra Madarasa: వాచీ దొంగలించాడని 16 ఏళ్ల విద్యార్థిపై ఉమ్ము వేయిస్తూ చితకబాదిన ఉపాధ్యాయుడు

ఔరంగాబాద్: ఓ పదహారేళ్ల విద్యార్థి వంద రూపాయల విలువైన వాచీని దొంగతనం చేశాడని ఉపాధ్యాయుడు అతడిపై ఇతర విద్యార్థులతో ఉమ్ము వేయిస్తూ చితకబాదిన అమానవీయ ఘటన మహారాష్ట్రలోని ఓ మదర్సా(Madarasa)లో చోటుచేసుకుంది.

పోలీసులు తెలిపిన వివరాల ప్రకారం... సూరత్‌కు చెందిన విద్యార్థి ఔరంగాబాద్‌లోని జామియా బుర్హానుల్ ఉలూమ్ మదర్సాలో చదువుకుంటున్నాడు. అతడు సమీపంలోని దుకాణం నుంచి వాచీ దొంగిలించాడని ఆ దుకాణదారు మదర్సాలోని ఉపాధ్యాయుడికి ఫిర్యాదు చేశారు. దొంగలించిన వాచీని విద్యార్థి వద్ద గుర్తించిన మతగురువు(cleric) మౌలానా సయ్యద్ ఒమర్ అలీ ఆ యువకుడిని అర్థనగ్నంగా మోకాళ్లపై కూర్చోబెట్టి తాను కొట్టడమే కాకుండా సహ విద్యార్థులు అందరితో వరుసగా అతడిపై ఉమ్ము వేయిస్తూ తీవ్రంగా కొట్టించాడు.  ఈ సంఘటనకు సంబంధించిన వీడియో బాధితుడి కుటుంబానికి దొరకడంతో వారు స్థానిక పోలీసులకు ఫిర్యాదు చేశారు. వెంటనే స్పందించిన పోలీసులు మతపెద్దపై మైనర్ స్టూడెంట్స్ ప్రొటెక్షన్ యాక్ట్ కింద కేసు నమోదు చేశారు. ఈ దాడిలో పాల్గొన్న మైనర్‌ యువకులకు కౌన్సెలింగ్‌ చేశారు.