PM Modi: ‘ఏపీ తీర్పు అపూర్వం’ - ప్రధాని మోదీ ధన్యవాదాలు

ఇంటర్నెట్‌ డెస్క్‌: ఎన్డీఏకు ఆంధ్రప్రదేశ్‌ ప్రజలు అపూర్వ విజయం అందించారని ప్రధానమంత్రి నరేంద్ర మోదీ పేర్కొన్నారు. రాష్ట్ర ప్రజల ఆశీస్సులకు ధన్యవాదాలు తెలుపుతున్నానని చెప్పారు. ఘన విజయం సాధించినందుకు గాను చంద్రబాబు నాయుడు, పవన్‌ కల్యాణ్‌ తోపాటు తెదేపా, జనసేన, భాజపా కార్యకర్తలకు అభినందనలు తెలియజేశారు. ఏపీ సర్వతోముఖాభివృద్ధితోపాటు రానున్న రోజుల్లో రాష్ట్రం అభివృద్ధి పథంలో నడిచేందుకు కృషి చేస్తామని పేర్కొంటూ ట్వీట్‌ చేశారు.

వరుసగా మూడోసారి ఎన్డీఏ కూటమిపై దేశ ప్రజలు విశ్వాసాన్ని ఉంచారని.. ఇదో చారిత్రక ఘట్టమని ప్రధాని మోదీ పేర్కొన్నారు. ప్రజల అభిమానానికి ధన్యవాదాలు తెలిపిన ఆయన.. వారి ఆకాంక్షలను నెరవేర్చేందుకు గడిచిన దశాబ్ది కాలంగా చేస్తున్న మంచి పనులను కొనసాగిస్తామన్నారు. ఈ విజయానికి కృషి చేసిన కార్యకర్తలందరికీ నమస్కరిస్తున్నానని అన్నారు.

మరోవైపు, ఒడిశా ప్రజలు కూడా అద్భుత విజయాన్ని అందించారని ప్రధాని మోదీ పేర్కొన్నారు. తమ సుపరిపాలనకు ఇది అఖండ విజయమన్నారు. రాష్ట్ర ప్రజల కలలను నెరవేర్చేందుకు ఏ అవకాశాన్నీ భాజపా వదులుకోదని.. అభివృద్ధిలో ఒడిశాను కొత్త శిఖరాలకు తీసుకువెళ్తామన్నారు.