Assam: ఉమ్మడి పౌరస్మృతి అమలు దిశగా అస్సాం కీలక నిర్ణయం

దిస్పూర్‌: ఉమ్మడి పౌరస్మృతి (యూసీసీ) అమలు దిశగా అస్సాం ప్రభుత్వం కీలక నిర్ణయం తీసుకుంది. ముస్లిం వివాహ, విడాకుల నమోదు చట్టాన్ని రద్దు చేయాలని నిర్ణయించింది. దీనికి రాష్ట్ర కేబినెట్‌ ఆమోదం తెలిపినట్లు ఆ రాష్ట్ర మంత్రి జయంత మల్ల బారుహా శుక్రవారం వెల్లడించారు. ఫిబ్రవరి 28 వరకు జరగనున్న అసెంబ్లీ సమావేశాల్లో ఈ బిల్లును ప్రవేశపెట్టే అవకాశం ఉన్నట్లు ప్రభుత్వవర్గాలు తెలిపాయి. ఒకవేళ ఇది కార్యరూపం దాలిస్తే యూసీసీని అమలు చేసేందుకు ముందుకొచ్చిన రెండో రాష్ట్రంగా అస్సాం నిలిచినట్లవుతుంది. 

ఇప్పటికే ఉత్తరాఖండ్‌ అసెంబ్లీ యూసీసీ బిల్లును ఆమోదించిన విషయం తెలిసిందే. దీనికి గవర్నర్‌ ఆమోద ముద్రవేస్తే దేశంలోనే ఉమ్మడి పౌరస్మృతిని అమలు చేసే తొలి రాష్ట్రంగా ఉత్తరాఖండ్‌ నిలవనుంది. ఈ బిల్లు అమల్లోకి వస్తే వివాహం, విడాకులు, భూములు, ఆస్తులు, వారసత్వం వంటి విషయాల్లో కులమతాలతో సంబంధం లేకుండా ఒకే నిబంధనలు వర్తించనున్నాయి. గిరిజనులకు మాత్రం ఈ బిల్లు వర్తించదు.