Sheikh Hasina: మోదీ ప్రమాణస్వీకారం.. దిల్లీ చేరుకున్న షేక్‌ హసీనా

దిల్లీ: బంగ్లాదేశ్‌ ప్రధాని షేక్‌ హసీనా (Sheikh Hasina) దిల్లీ చేరుకున్నారు. వరుసగా మూడోసారి నరేంద్ర మోదీ (PM Modi) ప్రధానిగా ఆదివారం ప్రమాణస్వీకారం (swearing ceremony) చేయనున్న సంగతి తెలిసిందే. ఈ కార్యక్రమంలో పాల్గొనేందుకు ఒకరోజు ముందుగానే ఆమె దిల్లీ వచ్చారు. విమానాశ్రయానికి చేరుకున్న షేక్‌ హసీనాకు.. అధికారులు ఘనస్వాగతం పలికారు. విదేశీ వ్యవహారాల శాఖ వెల్లడించిన వివరాల మేరకు..  మోదీ ప్రమాణ స్వీకారోత్సవానికి శ్రీలంక అధ్యక్షుడు రణిల్‌ విక్రమ్‌సింఘే, మాల్దీవుల అధ్యక్షుడు ముయిజ్జు, నేపాల్‌ ప్రధాని పుష్ప కమల్‌ దహల్‌ ప్రచండ, మారిషస్‌ ప్రధాని ప్రవింద్‌ కుమార్‌, భూటాన్‌ ప్రధాని తోబ్గే తదితర విదేశీ ప్రముఖులు హాజరుకానున్నారు. 

ఆదివారం సాయంత్రం 7.15 గంటలకు రాష్ట్రపతి భవన్‌లో ప్రమాణ స్వీకారోత్సవ కార్యక్రమం జరగనుంది. ఈనేపథ్యంలో దిల్లీ వ్యాప్తంగా భద్రతను కట్టుదిట్టం చేశారు. స్థానిక పోలీసులతోపాటు కీలక ప్రాంతాల్లో ఎన్‌ఎస్‌జీ బలగాలు పహారా కాస్తున్నాయి. దిల్లీని నో ఫ్లై జోన్‌గా ప్రకటించారు. మరికొన్ని రోజుల పాటు దిల్లీ, పరిసర ప్రాంతాల్లో డ్రోన్లు, పారాగ్లైడర్లు, రిమోట్‌ ఎయిర్‌క్రాఫ్ట్‌లను నిషేధించారు.