currency notes: మెడలో గడియారం.. కరెన్సీ నోట్లు గాల్లోకి విసిరేస్తూ..!

బెంగళూరులోని రద్దీ ప్రాంతంలో ఓ యువకుడు ఫ్లై ఓవర్‌ పై నుంచి కరెన్సీ నోట్లను గాల్లోకి విసిరాడు. వీటిని ఏరుకునేందుకు జనం గుమిగూడటంతో ట్రాఫిక్‌ జామ్‌ అయ్యింది.

Published : 24 Jan 2023 15:58 IST

బెంగళూరు: అది బెంగళూరు (Bengaluru)లో రద్దీగా ఉండే ఆర్కే మార్కెట్‌ కూడలి. నిత్యం వందలాది మంది వివిధ అవసరాల కోసం అక్కడికి వస్తుంటారు. ఆ కూడలిలో ఉన్న పైవంతెన (flyoverZ) పైకి హఠాత్తుగా ఓ యువకుడు కొంతమంది అనుచరులను వెనకేసుకొని వచ్చాడు. సంచీ లోంచి డబ్బులు (Currency notes) తీసి గాల్లోకి ఎగరేశాడు. వాటిని ఏరుకునేందుకు ఫ్లై ఓవర్‌ కింద జనం గుమిగూడారు. దీంతో మార్కెట్‌ ప్రాంతంలో వాహనాలు నిలిచిపోయి, భారీగా ట్రాఫిక్‌ జామ్‌ (Traffic Jam) అయ్యింది. దీనికి సంబంధించిన దృశ్యాలను అక్కడున్న వారు తమ సెల్‌ఫోన్లలో రికార్డు చేసి సామాజిక మాధ్యమాల్లో పోస్టు చేయడంతో వైరల్‌గా మారాయి.

ఎందుకిలా చేసినట్లు..

ఆ యువకుడు సూట్‌ ధరించి ప్రొఫెషనల్‌గా ఉన్నాడు. అంతేకాకుండా మెడలో గోడగడియారం వేలాడదీసుకున్నాడు. అలాగని ఖరీదైన నోట్లను కూడా గాల్లోకి విసర్లేదు. కేవలం 10 రూపాయల నోట్లనే విసిరినట్లు అక్కడున్న వారు చెబుతున్నారు.  ఈ మొత్తం దాదాపు రూ.3000 ఉండొచ్చని అంటున్నారు. కొందరు ఫ్లై ఓవర్‌ కింద నోట్లను ఏరుకుంటుంటే.. మరికొందరు మాత్రం ఫ్లైఓవర్‌పై అతడిని డబ్బులు అడిగారు. సమాచారం తెలుసుకున్న పోలీసులు అక్కడికి చేరుకునేలోపే ఆ యువకుడు అక్కడి నుంచి వెళ్లిపోయాడు. దీనిపై కేసు నమోదు చేసిన పోలీసులు నిందితుడి కోసం గాలిస్తున్నారు. శాంతిభద్రతలకు విఘాతం కలిగించినందుకు అతడిపై కేసు నమోదు చేశామని తెలిపారు. ఉద్దేశ పూర్వకంగా ఇలాంటి చర్యలకు పాల్పడటం వెనక ఉన్న కారణాలపై ఆరా తీస్తున్నామన్నారు.


Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని