Viral news: వీళ్లేం పోలీసులు.. ప్రమాదస్థలికి వెళ్లి ఇదేం పని!

పట్నా: ఏదైనా ప్రమాదమో, దొంగతనమో జరిగితే వెంటనే పోలీసులకు ఫోన్‌ చేస్తాం. వాళ్లు ఘటనా స్థలికి వస్తే.. ఎంతో ధైర్యంగా ఉంటుంది. కచ్చితంగా న్యాయం జరుగుతుందని భావిస్తాం. కానీ, బిహార్‌లోని (Bihar) ముజఫర్‌పుర్‌లో (Muzaffarpur) పోలీసులు వ్యవహరించిన తీరు వివాదాస్పదంగా మారింది. రోడ్డు ప్రమాదం జరిగిన చోటుకి వెళ్లిన పోలీసులు.. ఘటనలో ప్రాణాలు కోల్పోయిన వ్యక్తి మృతదేహాన్ని కాల్వలో పడేయడం చర్చనీయాంశమైంది. న్యాయం జరిగేలా చూడాల్సిన పోలీసులు, కనీస మానవత్వం లేకుండా వ్యవహరించడాన్ని పలువురు ప్రశ్నిస్తున్నారు. అటువైపుగా వెళ్తున్న వారు ఈ దృశ్యాలను సామాజిక మాధ్యమాల్లో పోస్టు చేయడంతో వైరల్‌గా మారింది.

మరోవైపు ఆ పోలీసుల తీరును సీనియర్‌ అధికారులు వెనకేసుకురావడం గమనార్హం. ప్రమాదంలో మృతదేహం పూర్తిగా ఛిద్రమైందని, కొన్ని శరీరభాగాలను రికవరీ చేయడానికి సాధ్యం కాకపోడంతోనే వాటిని కాల్వలో పడేశారని మీడియాకు వివరణ ఇచ్చారు. ఈ అంశం ఉన్నతాధికారుల దృష్టికి వెళ్లడంతో ఆగమేఘాల మీద కాల్వలోని మృతదేహాన్ని వెలికి శవాగారంలో భద్రపరిచారు. ఈ ఘటనకు పాల్పడిన పోలీసులపై అధికారులు చర్యలకు ఉపక్రమించారు. డ్రైవర్‌ కానిస్టేబుల్‌ను సస్పెండ్‌ చేసినట్లు జిల్లా ఎస్పీ తెలిపారు. అంతేకాకుండా మరో ఇద్దరు హోంగార్డులను విధుల నుంచి తొలగించినట్లు వెల్లడించారు.