JP Nadda: జేపీ నడ్డా సతీమణి కారు అపహరణ!

దిల్లీ: భాజపా అధ్యక్షుడు జేపీ నడ్డా (JP Nadda) సతీమణి కారును గుర్తు తెలియని వ్యక్తులు అపహరించినట్లు సమాచారం. దిల్లీలోని గోవిందపురి ప్రాంతంలో కనిపించకుండా పోయినట్లు తెలుస్తోంది. మార్చి 19న మధ్యాహ్నం 3 గంటల సమయంలో ఈ ఘటన జరిగినట్లు ఈ వ్యవహారంతో సంబంధం ఉన్న వ్యక్తులు వెల్లడించారు.

వారు తెలిపిన వివరాల ప్రకారం.. టయోటా ఫార్చునర్‌ కారును డ్రైవర్‌ జోగిందర్‌ సర్వీసింగ్‌ నుంచి తీసుకొచ్చారు. నడ్డా నివాసానికి చేరుకునే క్రమంలో మధ్యలో తన ఇంటి వద్ద భోజనం కోసం కారును బయట నిలిపి ఉంచాడు. ఆ సమయంలో దుండగులు కారును అపహరించారు. పోలీసులకు ఫిర్యాదు చేయడంతో ఎఫ్‌ఐఆర్‌ నమోదు చేసి దర్యాప్తు ప్రారంభించారు. సీసీటీవీ దృశ్యాలను పరిశీలించగా.. కారును గురుగ్రామ్‌ దిశగా తీసుకెళ్లినట్లు గుర్తించారు. ఎంత గాలింపు చేపట్టినా ఇప్పటి వరకు ఎలాంటి ఆచూకీ లభించలేదు. అపహరణకు గురైన కారు హిమాచల్‌ప్రదేశ్‌ రిజిస్ట్రేషన్‌ నంబర్‌తో ఉంది.