central Railway: సెంట్రల్‌ రైల్వే రికార్డ్‌.. జరిమానాలతో రూ.300 కోట్లు వసూలు

ముంబయి: రైల్వేలను (Indian Railways) ఎంత ఆధునికీకరిస్తున్నా.. కొత్తతరం రైళ్లను పట్టాలెక్కిస్తున్నా.. కట్టుదిట్టమైన చర్యలు తీసుకుంటున్నా.. ఇంకా టికెట్‌లేని ప్రయాణాలు కొనసాగుతూనే ఉన్నాయి. దీనికి సంబంధించి సెంట్రల్‌ రైల్వే (Central Railway) ఓ ప్రకటన విడుదల చేసింది. 2023-24 ఏడాదిలో జరిమానా రూపంలో రూ.300 కోట్లను వసూలు చేసినట్లు పేర్కొంది. టికెట్‌ లేని ప్రయాణం, ముందస్తుగా బుక్‌ చేయకుండానే లగేజ్‌ను తరలించడం.. తదితర కారణాలతో నమోదు చేసిన 46.26 లక్షల కేసుల్లో భారీ స్థాయిలో జరిమానా వసూలు చేసినట్లు ప్రకటనలో తెలిపింది. 2023-24 ఏడాదిలో దేశవ్యాప్తంగా అన్ని రైల్వే జోన్లలో వసూలైన మొత్తంతో పోలిస్తే ఇదే అత్యధికమని అధికారులు తెలిపారు.

దీనికి సంబంధించి ముంబయి కేంద్రంగా ఉన్న సెంట్రల్‌ రైల్వే కార్యాలయ అధికారులు పలు వివరాలు వెల్లడించారు. ‘‘కేసుల నమోదు, ఆదాయం పరంగా మిగతా జోన్‌లతో పోలిస్తే సెంట్రల్‌ రైల్వే జోన్‌లోనే అధికంగా నమోదయినట్లు పేర్కొన్నారు. ‘‘ముంబయి డివిజన్‌ పరిధిలో టికెట్‌ లేకుండా ప్రయాణం చేయడం వంటి కారణాలతో 20.56 లక్షల కేసులు నమోదు కాగా.. రూ.115.29 కోట్లు జరిమానా వసూలైంది. భుసావల్‌ డివిజన్‌ పరిధిలో 8.34 లక్షల కేసులకు గాను రూ. 66.33 కోట్లు వసూలు చేసి రెండో స్థానంలో నిలిచింది’’ అని సెంట్రల్‌ రైల్వే పేర్కొంది.