Katchatheevu: మోదీజీ.. కచ్చతీవును వెనక్కి తీసుకురాగలరా..?: కాంగ్రెస్ నేత సవాల్‌

చెన్నై: ఎన్నికల నేపథ్యంలోనే కచ్చతీవు అంశాన్ని ప్రధాని మోదీ (Modi) రాజకీయం చేస్తున్నారంటూ కాంగ్రెస్ విమర్శించింది. తమిళనాడు (Tamil Nadu)పై ఆయనకు అంత శ్రద్దే ఉంటే శ్రీలంక నుంచి దానిని వెనక్కి తీసుకురావాలని ఆ పార్టీ నేత మాణికం ఠాగూర్ సవాల్‌ విసిరారు.

‘‘ప్రధానికి సవాల్‌ విసురుతున్నాను. తమిళనాడు గురించి అంత పట్టింపు ఉంటే.. కచ్చతీవును వెనక్కి తీసుకువస్తారా..? పది సంవత్సరాల కాలంలో ఈ విషయంలో మోదీ విఫలమయ్యారు. ఈ రాష్ట్ర ప్రజల చేతిలో తిరస్కరణకు గురైన భాజపా.. ఇలా దారి మళ్లించే వ్యూహాలు ప్రయోగిస్తోంది’’ అని మాణికం ఠాగూర్ విమర్శించారు.

ఎన్నికలముందు ‘కచ్చతీవు’ రగడ.. జై శంకర్ ఏమన్నారంటే..?

1974లో కచ్చతీవును ఇందిర ప్రభుత్వం శ్రీలంకకు అప్పగించిందంటూ తమిళనాడు భాజపా అధ్యక్షుడు అన్నామలై సమాచారహక్కు చట్టం ప్రకారం సేకరించిన సమాచారం ఆధారంగా ఓ పత్రిక రాసిన కథనాన్ని మోదీ ‘ఎక్స్‌’లో ప్రస్తావించారు. ఈ క్రమంలోనే దానిపై రాజకీయ రగడ మొదలైంది.

ప్రధాని ఆరోపణలపై కాంగ్రెస్‌ అధ్యక్షుడు మల్లికార్జున ఖర్గే తీవ్రంగా స్పందించారు. తమిళనాడు ఎన్నికల నేపథ్యంలోనే ఈ సున్నిత అంశాన్ని ప్రధాని రాజకీయం చేస్తున్నారని మండిపడ్డారు. అధికారంలో ఉన్న పదేళ్లలో కచ్చతీవును వెనక్కి తెచ్చుకువచ్చేందుకు మోదీ ప్రభుత్వం తీసుకున్న చర్యలేమిటని ప్రశ్నించారు.