D Raja: సొమ్మసిల్లిపడిపోయిన డి.రాజా.. నిలకడగా ఆరోగ్యం

చెన్నై: సీపీఐ జాతీయ ప్రధాన కార్యదర్శి డి.రాజా(D Raja) అస్వస్థతకు గురయ్యారు. మణిపుర్‌లో పరిస్థితులను అదుపు చేయడంలో కేంద్ర ప్రభుత్వం వైఫల్యాన్ని నిరసిస్తూ తమిళనాడు రాజధాని చెన్నైలో సీపీఐ ఆధ్వర్యంలో చేపట్టిన ఆందోళన కార్యక్రమంలో పాల్గొన్న ఆయన విలేకర్లతో మాట్లాడుతుండగా సొమ్మసిల్లిపడిపోయారు. మణిపుర్‌లో మహిళలను నగ్నంగా ఊరేగించిన ఘటనను తీవ్రంగా ఖండిస్తూ సీపీఐ ఆధ్వర్యంలో నిరసన కార్యక్రమం జరిగింది. ఈ కార్యక్రమానికి హాజరైన డి.రాజాకు కళ్లు తిరుగుతున్నట్టుగా అనిపించి అకస్మాత్తుగా కుప్పకూలారు. దీంతో సీపీఐ కార్యకర్తలు హుటాహుటిన ఆయన్ను వాహనంలో స్టాన్లీ ఆస్పత్రికి తరలించారు. వైద్య పరీక్షల అనంతరం రాజా తిరిగి ఇంటికి వెళ్లిపోయారు. ప్రస్తుతం ఆయన ఆరోగ్య పరిస్థితి నిలకడగా ఉందని వైద్యులు వెల్లడించారు.