Air India: ఎయిర్‌ ఇండియాకు రూ.10 లక్షల జరిమానా.. వారం వ్యవధిలోనే రెండోసారి!

దిల్లీ: ఎయిర్‌ ఇండియా(Air India)కు తాజాగా మరో జరిమానా పడింది. గత ఏడాది పారిస్- దిల్లీ విమానంలో ప్రయాణికుల అనుచిత ప్రవర్తన ఘటనలను రిపోర్ట్‌ చేయనందుకుగానూ డీజీసీఏ(DGCA) రూ.10 లక్షల జరిమానా విధించింది. డిసెంబరు 6న పారిస్‌- దిల్లీ విమానంలో ఓ ప్రయాణికురాలు వాష్‌రూమ్‌కు వెళ్లినప్పుడు.. మరో వ్యక్తి ఆమె సీట్‌పై ఉన్న దుప్పటిపై మూత్రవిసర్జన చేశాడు. అదే రోజు చోటుచేసుకున్న మరో ఘటనలో.. మద్యం మత్తులో మరుగుదొడ్ల గదిలో పొగతాగుతూ ఓ వ్యక్తి విమాన సిబ్బందికి పట్టుబడ్డాడు. తాము నివేదిక కోరేంత వరకు ఈ ఘటనలపై ఎయిర్‌ ఇండియా రిపోర్ట్‌ చేయకపోవడాన్ని డీజీసీఏ ఇదివరకే తప్పుబట్టింది.

ప్రయాణికుల వికృత చేష్టలకు సంబంధించిన నిబంధనలు పాటించడంలో విమాన సంస్థ ప్రతిస్పందన లోపభూయిష్ఠంగా, ఆలస్యంగా ఉందని పేర్కొంది. ఈ క్రమంలోనే ఇటీవల షోకాజ్‌ నోటీసు జారీ చేసింది. తాజాగా రూ.10 లక్షల జరిమానా విధించింది. ఈ అనుచిత ప్రవర్తన ఘటనలను అంతర్గత కమిటీ దృష్టికి తీసుకెళ్లడంలో విమానయాన సంస్థ ఆలస్యం చేసినట్లు తాజాగా చెప్పింది. ఇదిలా ఉండగా.. న్యూయార్క్‌- దిల్లీ విమానంలో ఓ మహిళపై ప్రయాణికుడు మూత్ర విసర్జన చేసిన ఘటనలోనూ ఎయిర్‌ ఇండియాకు డీజీసీఏ రూ.30 లక్షల జరిమానా విధించిన విషయం తెలిసిందే. ఇలా వారం వ్యవధిలోనే ఎయిర్‌ ఇండియాకు రెండుసార్లు జరిమానా పడటం గమనార్హం.