ఓపీఎస్‌ కోసం సమ్మె చేస్తే తీవ్ర చర్యలు

ఉద్యోగులకు కేంద్రం హెచ్చరిక

దిల్లీ: పాత పెన్షన్‌ విధానాన్ని (ఓపీఎస్‌) పునరుద్ధరించాలంటూ జరుగుతున్న నిరసనల్లో పాల్గొనకూడదని తన ఉద్యోగులను కేంద్ర ప్రభుత్వం హెచ్చరించింది. సమ్మెలో పాల్గొన్నా, నిరసన తెలిపినా తీవ్ర చర్యలు తప్పవని స్పష్టం చేసింది. ఓపీఎస్‌ డిమాండులో భాగంగా దేశవ్యాప్తంగా అన్ని జిల్లా కేంద్రాల్లో మంగళవారం ర్యాలీలు చేపట్టాలని జాయింట్‌ ఫోరమ్‌ ఫర్‌ రీస్టోరేషన్‌ ఆఫ్‌ ఓల్డ్‌ పెన్షన్‌ స్కీమ్‌ పిలుపునిచ్చిన నేపథ్యంలో కేంద్రం ఈ హెచ్చరిక జారీ చేసింది. ఈ మేరకు అన్ని ప్రభుత్వశాఖల కార్యదర్శులకు సిబ్బంది, శిక్షణ వ్యవహారాలశాఖ (డీవోపీటీ) ఉత్తర్వులు జారీ చేసింది. ఉద్యోగులు ర్యాలీల్లో పాల్గొనకుండా నిషేధించాలని, సాధారణ సెలవులనూ మంజూరు చేయవద్దని సంబంధిత అధికారులకు డీవోపీటీ సూచించింది. వీటిని అతిక్రమిస్తే సీసీఎస్‌ 1964 నిబంధనల ప్రకారం చర్యలు ఉంటాయని స్పష్టం చేసింది. నిరసన చేపట్టిన ఉద్యోగుల వేతనాల్లో కోతతోపాటు క్రమశిక్షణ చర్యలు తీసుకుంటామని పేర్కొంది. ఈ నిబంధనలను అతిక్రమించి ఏ ఉద్యోగైనా.. నిరసనలో పాల్గొంటే సాయంత్రంలోగా డీవోపీటీకి తెలియజేయాలని కోరింది.