వధువు ముఖంపై సిందూరం చల్లిన వరుడు.. వివాహం రద్దు చేసుకున్న పెళ్లికుమార్తె

ముహూర్తం సమయానికి వరుడు మద్యం తాగి, వధువుపై సిందూరం చల్లిన కారణంగా ఓ యువతి మండపంలోనే పెళ్లికి నిరాకరించింది. ఈ ఘటన ఉత్తర్‌ప్రదేశ్‌లో చోటుచేసుకుంది. శుక్రవారం సాయంత్రం పెళ్లి జరగాల్సి ఉండగా.. వధూవరులు బంధుమిత్రులతో కలిసి ఊరేగింపుగా మీర్జాపుర్‌ జిల్లా మాణిక్‌పుర్‌ చేరుకున్నారు. పెళ్లికి ముందు చేయాల్సిన పూజలు నిర్వహించారు. ఈ క్రమంలో తాగిన మైకంలో పెళ్లి కుమారుడు.. వధువుకు సిందూరం పెట్టలేకపోయాడు. అంతేకాకుండా ఆమెపై సిందూరం చల్లటం ప్రారంభించాడు. ఆపే ప్రయత్నం చేయడంతో వధువుపై చేయి చేసుకున్నాడు. దీంతో ఆ యువతి పెళ్లికి నిరాకరించింది. అనంతరం ఇరువర్గాల వారు పోలీసులను ఆశ్రయించారు. వివాహ  ఖర్చులు తిరిగి చెల్లించటానికి వరుడి కుటుంబం అంగీకరించింది.