Uttar Pradesh: రైతు కుటుంబాల నుంచి రోజుకొకరు ఎలుగుబంటిగా..

విత్తు వేసింది మొదలు పంట చేతికి వచ్చేదాకా రైతులు పడే పాట్లు చెప్పనలవి కావు. ఉత్తర్‌ప్రదేశ్‌లోని లఖింపుర్‌ ఖేరి ప్రాంత చెరకు రైతులు తమ పంటను కోతుల బారి నుంచి రక్షించుకునేందుకు ఎలుగుబంటి అవతారం ఎత్తుతున్నారు. ఈ సమస్యను పలుమార్లు అటవీ అధికారుల దృష్టికి తీసుకువెళ్లినా వారి నుంచి స్పందన రాకపోవడంతో విసుగుచెందిన రైతులు ఈ ఆలోచన చేశారు. రోజంతా ఎలుగుబంటి వేషధారణలో పొలాల వద్ద చక్కర్లు కొడుతూ పంటకు కాపలా కాస్తున్నారు. కోతులు తరచూ పంటలపై, పక్కనే ఉన్న పశువులపై దాడి చేసి రైతులను తీవ్రంగా నష్టపరుస్తున్నాయి. దీంతో రైతులు తలా కొంత డబ్బు పోగు చేసి ఎలుగుబంటి ముసుగు కొన్నారు. రోజుకు ఒకరు ఆ ముసుగు ధరించి పంటలకు రక్షణగా ఉంటున్నారు. రోజంతా ముసుగులోనే ఉండటం కష్టంగా ఉందని, అధికారులు స్పందించి చర్యలు తీసుకోవాలని గజేంద్రసింగ్‌ అనే రైతు కోరారు.