Non-Vegetarian Food: మాంసాహారం వల్లే ప్రకృతి విపత్తులు: ఐఐటీ మండీ డైరెక్టర్‌ వ్యాఖ్య

దిల్లీ: హిమాచల్‌ప్రదేశ్‌లో ఇటీవల చోటు చేసుకున్న విపత్తులను జీవహింసతో ముడిపెడుతూ ఐఐటీ మండీ డైరెక్టర్‌ చేసిన వ్యాఖ్యలు చర్చనీయాంశమయ్యాయి. ప్రజల మాంసాహారపు అలవాట్లు, జీవహింస వల్లే ప్రకృతి విపత్తులు సంభవిస్తున్నాయని చెప్పడం వివాదాస్పదమైంది. అంతేకాకుండా మాంసాహారాన్ని తినబోమంటూ విద్యార్థులతో ప్రతిజ్ఞ చేయించారు. ‘‘అమాయకమైన జంతువులను వధిస్తున్నారు. పరస్పరాధారిత సహజీవి సంబంధం వల్ల ఇది పర్యావరణ విధ్వంసానికి దారితీస్తోంది. తక్షణమే మనకు కనిపించకున్నా దాని దుష్ప్రభావమైతే తప్పదు. అనేక ఉత్పాతాలు తరచూ సంభవిస్తుంటాయి. ఇదంతా మనుషులు మాంసాహారాన్ని భుజించడం వల్లే’’నంటూ లక్ష్మీధర్‌ బెహరా విద్యార్థులతో చెబుతున్న వీడియో సామాజిక మాధ్యమాల్లో వ్యాప్తిలోకి వచ్చింది. ‘మంచి మనుషులుగా మారాలంటే మాంసం తినకూడద’ని ఆయన హితబోధ చేశారు. ఈ వీడియోను తిలకించిన నెటిజన్లు విమర్శలు గుప్పిస్తున్నారు.