లైంగిక వేధింపులకు గురైనందుకే.. మంత్రి పదవికి రాజీనామా

పుదుచ్చేరి మంత్రి చంద్రప్రియాంక

ఆర్కేనగర్‌, న్యూస్‌టుడే: లైంగిక వేధింపులకు గురైనందుకే మంత్రి పదవికి రాజీనామా చేశానని ఓ మహిళా నేత ప్రకటించడం సంచలనం సృష్టించింది. ఎన్నార్‌ కాంగ్రెస్‌ పార్టీకి చెందిన పుదుచ్చేరి రవాణాశాఖ మంత్రి చంద్రప్రియాంక మంగళవారం తన పదవికి రాజీనామా చేశారు. దీనికి గల కారణాలను వివరిస్తూ ప్రజలకు ఆమె ఓ లేఖ విడుదల చేశారు. ‘అణగారిన వర్గానికి చెందిన నేను కులపరంగా, లైంగికపరంగా వేధింపులకు గురయ్యాను. ఆధిపత్య శక్తులకు వ్యతిరేకంగా పోరాడుతూ మంత్రిగా కొనసాగలేను’ అని ప్రియాంక లేఖలో పేర్కొన్నారు. దీంతో ఆమెను ఇలా ఇబ్బంది పెట్టింది ఎవరన్న దానిపై చర్చ మొదలైంది. పుదుచ్చేరిలో 40 ఏళ్ల తర్వాత మహిళకు మంత్రివర్గంలో స్థానం లభించగా ఇప్పుడు ఆమె తీవ్ర విమర్శలు చేస్తూ రాజీనామా చేయడం గమనార్హం.