వృత్తలేఖినితో దాడి కేసు జువైనల్‌ జస్టిస్‌ బోర్డుకు

ఇందౌర్‌: మధ్యప్రదేశ్‌లో ఇందౌర్‌లో తమ తోటి విద్యార్థిని మరో ముగ్గురు విద్యార్థులు వృత్తలేఖిని (జామెట్రీ కంపాస్‌)తో పొడిచిన కేసును జువైనల్‌ జస్టిస్‌ బోర్డుకు అప్పగించాలని ఇందౌర్‌ పోలీసులు నిర్ణయించారు. అలాగే బాధిత విద్యార్థి వైద్య నివేదిక సహా ఇతర పత్రాలతోపాటు ఈ వ్యవహారంతో సంబంధం గల విద్యార్థుల సామాజిక స్థితిగతులపైనా రూపొందించిన నివేదికను వారు బోర్డుకు సమర్పించనున్నారు. ఈ మేరకు ఓ పోలీసు అధికారి మంగళవారం వెల్లడించారు. ఈ నెల 24న ఓ ప్రైవేటు పాఠశాలలో జరిగిన ఈ ఘటనలో 4వ తరగతికి చెందిన ఓ విద్యార్థిపై అదే తరగతికి చెందిన మరో ముగ్గురు విద్యార్థులు వృత్తలేఖినితో వందసార్లకు పైగా పొడిచారు. వీరంతా 10 సంవత్సరాలలోపు వారు కావడం గమనార్హం. అయితే వారి మధ్య గొడవకు దారితీసిన అసలు కారణమేమిటనేది తెలియరాలేదు.