నిర్ణయం తీసుకునే ముందే చర్చించాలి

మొయిత్రా అంశంపై విపక్షాల డిమాండ్‌

దిల్లీ: టీఎంసీ ఎంపీ మహువా మొయిత్రాపై నైతిక విలువల కమిటీ ఇచ్చిన నివేదికపై లోక్‌సభలో చర్చించిన తర్వాతే ఏ నిర్ణయమైనా తీసుకోవాలని ప్రతిపక్షాలు డిమాండు చేశాయి. సోమవారం స్పీకర్‌ ఓం బిర్లా అధ్యక్షతన జరిగిన సభావ్యవహారాల సలహా సంఘం సమావేశంలో ఈ అంశాన్ని విపక్షాలు లేవనెత్తాయి. కమిటీ నివేదిక మ్యాచ్‌ ఫిక్సింగ్‌ లాంటిదని, ఫిర్యాదు చేసిన భాజపా ఎంపీ ఎటువంటి ఆధారాలను సమర్పించలేదని తెలిపాయి. మరోవైపు ఈ నివేదిక మంగళవారం సభ ముందుకు వచ్చే అవకాశముందని తెలుస్తోంది. దానిపై చర్చించి ఓటింగ్‌ జరిగి ఆమోదం లభిస్తే మొయిత్రాపై అనర్హత వేటు పడుతుంది. వాస్తవానికి నివేదికను సోమవారం జాబితాలోనే చేర్చారు. అయితే ప్రిసైడింగ్‌ అధికారి దానిని పరిగణనలోకి తీసుకోలేదు.