రోజుకు సగటున 78 హత్యలు

2022లో దేశవ్యాప్తంగా 28,522 కేసులు
సాధారణ నేరాల్లో తగ్గుదల
మహిళలు, చిన్నారులపై మాత్రం పెరిగాయి
జాతీయ నేర గణాంకాలు-2022లో వెల్లడి

ఈనాడు, దిల్లీ: దేశంలో 2022లో 28,522 హత్యకేసులు నమోదయ్యాయి. అంటే రోజుకు సగటున 78 హత్యలు జరిగాయి. 2021లో నమోదైన మొత్తం హత్య కేసులతో(29,272) పోల్చితే 2022లో 2.6 శాతం తగ్గుదల నమోదైంది. వివాదాలే హత్యలకు ప్రధాన కారణాలు. ఆ తర్వాత ప్రధాన కారణాలుగా వ్యక్తిగత ప్రతీకారం, శతృత్వం, వ్యక్తిగత ప్రయోజనం ఉన్నాయి. ఇక సాధారణ నేరాలు 2022లో తగ్గాయి. మహిళలు, చిన్నారులు, ఎస్సీ, ఎస్టీలు, వయోవృద్ధులపై మాత్రం పెరిగాయి. సోమవారం విడుదలైన జాతీయ నేరగణాంకాలు-2022 ఈ విషయాన్ని వెల్లడించాయి. 2021తో పోలిస్తే 2022లో సాధారణ నేరాల సంఖ్య 4.5% మేర తగ్గింది. అదే సమయంలో మహిళలపై 4%, చిన్నారులపై    8.7% పెరిగాయి. కిడ్నాప్‌లు 5.8%, వృద్ధులపై వేధింపులు 9.3%, ఎస్సీలపై వేధింపులు 13.1%, ఎస్టీలపై నేరాలకు సంబంధించి  14.3% మేర కేసులు ఎక్కువయ్యాయి. ఆర్థిక నేరాలు 11.1%, అవినీతి కేసులు 10.5%, సైబర్‌నేరాలు 24.4% వృద్ధి చెందాయి. మనుషుల అక్రమ రవాణా 2.8% ఎక్కువైంది. ఇందులో మిస్సింగ్‌ కేసులు 13.5% పెరగ్గా, ఆచూకీ తెలియని చిన్నారుల కేసులు 7.5% వృద్ధి చెందాయి. ఆస్తి సంబంధ నేరాలూ 10.1% పెరిగాయి.

•  2022లో గుర్తించదగ్గ నేరాలు మొత్తం 58,24,946 నమోదయ్యాయి. ఇందులో ఐపీసీ కింద 35,61,379, ఇతర ప్రత్యేక, స్థానిక చట్టాల కింద 22,63,567 కేసులు నమోదయ్యాయి. అంతకు ముందు ఏడాది నమోదైన 60,96,310 కేసులతో పోలిస్తే 2022లో 2,71,364 (4.5%) మేర తగ్గుదల నమోదైంది.
• క్రైం రేట్‌ (ప్రతి లక్ష మంది జనాభాకు) 445.9 నుంచి 422.2కు దిగివచ్చింది.
• దేశవ్యాప్తంగా 2022లో 1,07,588 కిడ్నాప్‌ కేసులు నమోదయ్యాయి. ఇది క్రితం సంవత్సరం కంటే (1,01,707) 5.8% ఎక్కువ. ఇందులో మహిళలు (88,861) అత్యధికంగా ఉన్నారు. 2021తో పోలిస్తే ఐపీసీ కింద నమోదైన కేసులు 2.8%, ప్రత్యేక, స్థానిక చట్టాల కింద నమోదైన కేసులు 7% తగ్గాయి. సామాజిక ప్రశాంతతను దెబ్బతీసే కేసులు 63,391 నుంచి 57,082 (10%)కి తగ్గాయి.
• మహిళలపై కేసులు 4,28,278 నుంచి 4,45,256కు (4%) పెరిగాయి. ఇందులో భర్త, బంధువుల హింస (31.4%)కు సంబంధించినవే అత్యధికం ఉన్నాయి. ఆ తర్వాత స్థానంలో కిడ్నాప్‌ (19.2%), లైంగికదాడి (18.7%), అత్యాచారం (7.1%) కేసులు ఉన్నాయి. ప్రతి లక్ష మందిపై నమోదైన నేరాలు 2021లో 64.5 మేర ఉండగా, 2022లో ఆ సంఖ్య 66.4కి పెరిగింది.
• చిన్నారులపై నేరాలు 1,49,404 నుంచి 1,62,449కి (8.7%) పెరిగాయి. ఇందులో అత్యధికం కిడ్నాప్‌ (45.7%), అత్యాచారంతోసహా పోక్సో చట్టం కింద నమోదైన కేసులు (39.7%) ఉన్నాయి. చిన్నారులపై క్రైం రేట్‌ 33.6 నుంచి 36.6కు పెరిగింది.
• జువెనైల్‌ కేసులు 31,170 నుంచి 30,555 (2%)కు తగ్గాయి. 30,555 కేసుల్లో 37,780 మంది బాలలను అరెస్టు చేశారు. ఇందులో 78.6% మంది 16 నుంచి 18 ఏళ్లలోపువారే.
• సీనియర్‌ సిటిజన్లపై కేసులు 26,110 నుంచి 28,545(9.3%)కు పెరిగాయి. ఇందులో 27.3% సాధారణ దాడులకు సంబంధించినవికాగా, దొంగతనాలకు సంబంధించినవి 13.8%, ఫోర్జరీ, చీటింగ్‌, ఫ్రాడ్‌కు సంబంధించనవి 11.2% మేర ఉన్నాయి.
• ఎస్సీ అట్రాసిటీ కింద కేసులు 50,900 నుంచి 57,572 (13.1%)కి పెరిగాయి. వీరిపై క్రైమ్‌రేట్‌ ఏడాది కాలంలో 25.3 నుంచి 28.6కు పెరిగింది.
• ఎస్టీ అట్రాసిటీ కేసులు 8,802 నుంచి 10,064 (14.3)కి పెరిగాయి. వీరిపై క్రైమ్‌రేట్‌ 8.4 నుంచి 9.6కి పెరిగింది.
• ఆర్థిక నేరాల కేసులు 1,74,013 నుంచి 1,93,385 (11.1%) పెరిగాయి. ఇందులో విశ్వాసఘాతుకం, ఫోర్జరీ, చీటింగ్‌, దొంగనోట్ల కేసులు అత్యధికం ఉన్నాయి.
• రాష్ట్రాల అనిశాలు నమోదుచేసిన అవినీతి కేసులు 3,745 నుంచి 4,139 (10.5%)పెరిగాయి. ఇందులో 69.7% వలపన్ని పట్టుకున్నవే. ఈ కేసుల్లో 4,994 మందిని అరెస్ట్‌ చేయగా, అందులో 852 మందికి శిక్షపడింది.
• సైబర్‌నేరాలు ఏడాది కాలంలో 52,974 నుంచి 65,893 (24.4%)కు పెరిగాయి. ఈ విభాగంలో క్రైమ్‌ రేట్‌ 3.9 నుంచి 4.8కి పెరిగింది. ఇందులో 64.8% కేసులకు ప్రధాన కారణం మోసం. అక్రమ వసూళ్ల కింద 5.5%, లైంగిక దోపిడీ కింద 5.2% కేసులు నమోదయ్యాయి.
• రాష్ట్ర ప్రభుత్వాలకు వ్యతిరేకంగా నమోదైన కేసులు 5,164 నుంచి 5,610 (8.6%)కి పెరిగాయి. ఇందులో 78.5% కేసులు ప్రభుత్వ ఆస్తుల ధ్వంసం చేసిన కారణంగా, 17.9% కేసులు చట్టవ్యతిరేక కార్యకలాపాల నిరోధక చట్టం కింద నమోదయ్యాయి.
• విదేశీయులకు వ్యతిరేకంగా జరిగిన నేరాలకు సంబంధించిన కేసులు 150 నుంచి 192కి పెరిగాయి. ఇందులో 28% వృద్ధి నమోదైంది. ఇందులో 34 దొంగతనాలు, 28 అత్యాచారాలకు సంబంధించిన కేసులు ఉన్నాయి. 192 కేసుల్లో 222 మంది బాధితులు ఉండగా, అందులో 56.8% మంది ఆసియా, 18% మంది ఆఫ్రికన్‌ ఖండాలకు చెందినవారు ఉన్నారు.
• విదేశీయులకు వ్యతిరేకంగా నమోదైన కేసుల సంఖ్య 2,585 నుంచి 2,100కి (18.8%) తగ్గిపోయింది.
• మనుషుల అక్రమ రవాణా కేసులు 2,189 నుంచి 2,250 (2.8%)కి పెరిగాయి. అక్రమరవాణాకు గురైన వారిలో 2,878 మంది చిన్నారులు ఉండగా, 3,158 మంది పెద్దలు ఉన్నారు.
• 2022లో 4,42,572 మంది వ్యక్తులు తప్పిపోయారు. అంతకుముందు సంవత్సరంకంటే ఇది 13.5% అధికం. ఇందులో 1,49,008 మంది పురుషులు, 2,93,500 మంది మహిళలు, 64 మంది ట్రాన్స్‌జెండర్లు ఉన్నారు. 2022లో తప్పిపోయినవారిలో మొత్తం 4,01,077 మందిని గుర్తించారు.
• తప్పిపోయిన చిన్నారుల సంఖ్య ఏడాదిలో 77,535 నుంచి 83,350కి పెరిగింది. ఇందులో 20,380 మంది బాలురు, 62,946 మంది బాలికలు, 24 ట్రాన్స్‌జెండర్లు ఉన్నారు.
• ఆస్తి గొడవలకు సంబంధించిన 7,62,368 నుంచి 8,39,252 (10.1%)కి పెరిగాయి. ఇందులో 77.8% దొంగతనం, 12.8% దోపిడీకి సంబంధించినవి. ఈ ఏడాదిలో రూ.5,223.3 కోట్ల విలువైన ఆస్తులు చోరీకి గురయ్యాయి. అందులో రూ.1,882.5 కోట్ల ఆస్తులు రికవరీ అయ్యాయి.
• 2,79,185 ఆస్తి తగాదాలు నివాస ప్రాంగణాల్లో జరగ్గా, 16,014 దోపిడీలు జాతీయ రహదారులు, ఇతర రహదారుల్లో చోటుచేసుకున్నాయి.
• రూ.382.66 కోట్ల విలువైన 42,10,406 నకిలీ నోట్లను పట్టుకున్నారు.
• శిక్షలు అత్యారం కేసుల్లో అతితక్కువగా 27.4%మాత్రమే పడ్డాయి. హత్య కేసుల్లో 43.8%, కిడ్నాప్‌ కేసుల్లో 33.9%, దాడుల కేసుల్లో 35.9%, కలహాల కేసుల్లో 24.9% మాత్రమే శిక్షలు పడ్డాయి.