ఉద్యోగానికి రాజీనామా చేసి మరీ.. రోగులకు సేవ

కేరళలోని కన్నూర్‌ జిల్లా బక్కళం ప్రాంతానికి చెందిన శోభన.. క్యాన్సర్‌, ఇతర వ్యాధులతో బాధపడుతూ మంచాన పడిన నిరుపేద రోగుల సేవలో తరిస్తున్నారు. క్యాన్సర్‌ బారినపడిన తన సోదరుడి భార్య అవస్థలను శోభన కళ్లారా చూశారు. ఆమె మరణించడంతో  రోగులకు సేవ చేసేందుకు పూర్తి సమయం వెచ్చించాలని నిర్ణయించుకున్నారు. ఇందుకోసం పదేళ్లుగా చేస్తున్న ఉపాధ్యాయ ఉద్యోగానికి సైతం రాజీనామా చేశారు. ప్రస్తుతం సంజీవని పాలియేటివ్‌ కేర్‌ సహకారంతో అంబులెన్స్‌లో రోజూ రోగుల ఇంటికి వెళ్లి శోభన సేవలు చేస్తున్నారు. అవసరమైన ఔషధాలు అందజేస్తున్నారు. ఇలా సుమారు 150 కిలోమీటర్లు ప్రయాణించి రోజూ 25 మంది నుంచి 30 మంది రోగులకు సాంత్వన చేకూర్చుతున్నారు. ఉచిత సేవ కోసం వివిధ దుకాణాల్లో ఏర్పాటుచేసిన కాయిన్‌ బాక్సుల ద్వారా శోభన విరాళాలు సేకరిస్తున్నారు.