గుండెపోట్ల కలవరం.. 10 లక్షల మందికి సీపీఆర్‌ శిక్షణ

దిల్లీ: వయసుతో సంబంధం లేకుండా ఇటీవలి కాలంలో ఎక్కువ అవుతున్న గుండెపోటు మరణాలు తీవ్ర కలవరపాటుకు గురిచేస్తున్నాయి. నెల రోజుల కిందట గుజరాత్‌లో దసరా పండగ సందర్భంగా గర్బా నృత్యం చేస్తూ కొందరు మృతిచెందడం ఆందోళన కలిగించింది. ఈ అనూహ్య మరణాలను తగ్గించేందుకు కేంద్ర ప్రభుత్వం చర్యలు ప్రారంభించింది. దేశవ్యాప్తంగా సీపీఆర్‌ టెక్నిక్‌లో శిక్షణ ఇచ్చేందుకు బుధవారం కేంద్ర ఆరోగ్యశాఖ ఒక ప్రత్యేక కార్యక్రమాన్ని ప్రారంభించింది. కేంద్ర ఆరోగ్యశాఖ మంత్రి మన్‌సుఖ్‌ మాండవీయ ఈ శిక్షణ కార్యక్రమానికి శ్రీకారం చుట్టారు. ఇందులో భాగంగా దేశవ్యాప్తంగా సుమారు 10 లక్షల మందికి సీపీఆర్‌లో శిక్షణ ఇవ్వనున్నారు. గుర్తింపు పొందిన వెయ్యికి పైగా వైద్యకేంద్రాల ద్వారా ఈ శిక్షణ అందుతుంది. జిమ్‌లలో పనిచేసేవారూ ఈ శిక్షణలో భాగమవుతారు. అధికారిక గణాంకాల ప్రకారం.. 2021 - 2022 మధ్య గుండెపోటు మరణాలు 12.5 శాతం పెరిగాయి. గుజరాత్‌లో గత ఆరు నెలల్లో గుండెపోటు కారణంగా 1,052 మంది ప్రాణాలు కోల్పోయినట్లు ఆ రాష్ట్ర  ప్రభుత్వం వెల్లడించింది. ఇందులో 80 శాతం మంది 11-25 ఏళ్ల మధ్య వయసువారే. ఈ నేపథ్యంలో సీపీఆర్‌పై దాదాపు 2 లక్షల మంది టీచర్లు, కళాశాలల సిబ్బందికి శిక్షణ ఇవ్వనున్నారు.