మాజీ గవర్నర్‌ సత్యపాల్‌ మాలిక్‌ ఇంట్లో సీబీఐ సోదాలు

దిల్లీ: కిరు హైడ్రో ఎలక్ట్రిక్‌ ప్రాజెక్టుకు సంబంధించిన అవినీతి కేసులో జమ్మూ కశ్మీర్‌ మాజీ గవర్నర్‌ సత్యపాల్‌ మాలిక్‌సహా ఆయన సన్నిహితుల నివాసాల్లో కేంద్ర దర్యాప్తు సంస్థ సోదాలు చేపట్టింది. గురువారం ఉదయం నుంచే దాదాపు 100 మంది సీబీఐ అధికారులు దిల్లీసహా 30 నగరాల్లో సోదాలు జరిపారు. దిల్లీలోని ఆర్‌కే పురం, ఏషియన్‌ గేమ్స్‌ విలేజ్‌లో మాలిక్‌తో సంబంధం ఉన్న ప్రాంగణాలతోపాటు గురుగ్రామ్‌, బాగ్‌పట్‌లలోనూ తనిఖీలు నిర్వహించారు. తన నివాసాల్లో సోదాల సందర్భంగా సత్యపాల్‌ మాలిక్‌ ఎక్స్‌ వేదికగా స్పందించారు. తాను కొద్ది రోజులుగా అనారోగ్యంతో ఆసుపత్రిలో చికిత్స పొందుతున్నట్లు చెప్పారు. ‘నేను అనారోగ్యంతో ఉన్నప్పటికీ నా నివాసంపై నిరంకుశ శక్తులు దాడి చేస్తున్నాయి. ఈ సోదాల ద్వారా నా డ్రైవరు, సహాయకుడిని వేధిస్తున్నాయి. ఇలాంటి వాటికి నేను భయపడను. నేను రైతులకు అండగా నిలుస్తాను’ అని స్పష్టం చేశారు. రూ.2,200 కోట్ల విలువైన కిరు హైడ్రో ఎలక్ట్రిక్‌ పవర్‌ ప్రాజెక్టు పనుల కేటాయింపులో అవినీతి జరిగిందని ఆరోపణలొచ్చాయి. దీంతో 2022 ఏప్రిల్‌లో మాలిక్‌సహా ఐదుగురు వ్యక్తులపై సీబీఐ కేసు నమోదు చేసింది.