రాజ్యసభ అభ్యర్థుల్లో 36% మందిపై క్రిమినల్‌ కేసులు

దిల్లీ: రాజ్యసభకు పోటీ చేసే అభ్యర్థుల్లో 36% మందిపై క్రిమినల్‌ కేసులు ఉన్నాయని, ఒక్కో అభ్యర్థికి సగటున రూ.127.81 కోట్ల విలువ చేసే ఆస్తులు ఉన్నట్లు అసోసియేషన్‌ ఫర్‌ డెమొక్రటిక్‌ రీఫార్మ్స్‌ (ఏడీఆర్‌) సంస్థ తెలిపింది. ఈ నెల 27న రాజ్యసభ ఎన్నికలు జరగనున్న సంగతి తెలిసిందే. ఈ ఎన్నికల్లో 15 రాష్ట్రాల్లోని 56 రాజ్యసభ స్థానాలకు 59 మంది పోటీపడుతున్నారు. వీరిలో 58 మంది ప్రమాణపత్రాలను ఏడీఆర్‌ విశ్లేషించింది. ఈ 58 మందిలో 17% మందిపై తీవ్రమైన క్రిమినల్‌ కేసులున్నాయి. మరొకరిపై హత్యాయత్నం కేసు ఉందని ఏడీఆర్‌ పేర్కొంది. దాదాపుగా 21% మంది అభ్యర్థులు బిలియనీర్లు (రూ.100 కోట్లకు పైగా ఆస్తులు కలవారు). 17% మంది అభ్యర్థుల విద్యార్హతలు 5 నుంచి 12 తరగతి మధ్య ఉండగా..79 శాతం మంది డిగ్రీ పూర్తి చేశారు. 51-70ఏళ్ల వయసు ఉన్నవారు 76% ఉండగా, 31-50 ఏళ్ల వారు 16% ఉన్నారు. మహిళలు కేవలం 19 శాతమే ఉండడం గమనార్హం.