5 గంటలు రన్‌వేపై విమానంలోనే.. ఊపిరాడక చిన్నారులకు అస్వస్థత

ముంబయి: ప్రముఖ విమానయాన సంస్థ ఎయిర్‌ మారిషస్‌కు చెందిన ఓ విమానంలో శనివారం సాంకేతిక సమస్య ఏర్పడింది. దీంతో ప్రయాణికులు కొన్ని గంటల పాటు విమానంలోనే ఉండిపోయారు. ఈ క్రమంలోనే పలువురు చిన్నారులు ఊపిరాడక అస్వస్థతకు గురయ్యారు. ఎంకే 749 విమానం శనివారం తెల్లవారుజామున 4.30 గంటలకు ముంబయి నుంచి మారిషస్‌ బయల్దేరాల్సి ఉంది. 3.45 గంటల నుంచి ప్రయాణికులను విమానంలోకి అనుమతించారు. అందరూ ఎక్కిన తర్వాత టేకాఫ్‌ చేస్తుండగా ఇంజిన్‌ లో సమస్య ఏర్పడింది. దీంతో విమానాన్ని రన్‌వేపైనే నిలిపివేశారు. ప్రయాణికులు కిందకు దిగేందుకు అనుమతించలేదు. దాదాపు 5 గంటలపాటు వారు అందులోనే ఉండాల్సి వచ్చింది. ఆ సమయంలో ఏసీలు పనిచేయకపోవడంతో ప్రయాణికుల్లోని పలువురు చిన్నారులు, వృద్ధులు అస్వస్థతకు గురయ్యారు.