సరకు రవాణా నౌకకు భారత నేవీ సాయం

దిల్లీ: గల్ఫ్‌ ఆఫ్‌ ఎడెన్‌లో క్షిపణి దాడి అనంతరం మంటల్లో చిక్కుకున్న ఒక వాణిజ్య నౌకకు భారత యుద్ధనౌక సాయం అందించింది. నేవీకి చెందిన పేలుడు పదార్థాల నిపుణులు ఆ నౌకలోకి ప్రవేశించి.. పేలకుండా మిగిలిపోయిన బాంబులు ఏమైనా ఉన్నాయా అన్నది క్షుణ్నంగా తనిఖీ చేశారు. అంతా సవ్యంగా ఉందనుకున్నాక దాని ప్రయాణానికి అనుమతించారు. బ్రిటన్‌కు చెందిన ఎంవీ ఐలాండర్‌ అనే ఆ నౌకపైకి ఈ నెల 22న హూతీ మిలిటెంట్లు రెండు నౌకా విధ్వంసక బాలిస్టిక్‌ క్షిపణులను ప్రయోగించారు. దీనివల్ల నౌక స్వల్పంగా దెబ్బతింది. దాని సిబ్బందికి కూడా గాయాలయ్యాయి. ఆ నౌక నుంచి వచ్చిన అత్యవసర సందేశానికి మన నౌకాదళం స్పందించింది. ఆ ప్రాంతంలో మోహరించిన భారత డిస్ట్రాయర్‌ యుద్ధనౌక వెంటనే ఎంవీ ఐలాండర్‌ వద్దకు చేరుకుంది. తొలుత నౌకలోకి చేరుకున్న నేవీ వైద్య బృందం.. గాయపడిన సిబ్బందికి చికిత్స అందించింది. అనంతరం పేలుడు పదార్థాల నిపుణులు పరిశీలనలు చేపట్టారు.