ముస్లిం వివాహ చట్టం రద్దుకు అస్సాం మంత్రివర్గం ఆమోదం

ముఖ్యమంత్రి హిమంత బిశ్వశర్మ వెల్లడి

గువాహటి: అస్సాం ముస్లిం వివాహాలు, విడాకుల నమోదు చట్టం-1935 రద్దుకు అస్సాం మంత్రివర్గం ఆమోదం తెలిపిందని ఆ రాష్ట్ర ముఖ్యమంత్రి హిమంత బిశ్వశర్మ తెలిపారు. బాల్య వివాహాలకు స్వస్తి పలికేందుకే ఈ నిర్ణయం తీసుకున్నట్లు వెల్లడించారు. ‘‘చట్ట ప్రకారం వరుడు, వధువులకు అవసరమైన కనీస వివాహ వయసు 21 సంవత్సరాలు, 18 సంవత్సరాలు రాకపోయినప్పటికీ వివాహాన్ని నమోదు చేసేందుకు అవసరమైన నిబంధనలు ఈ చట్టంలో ఉన్నాయి. శుక్రవారం రాత్రి మంత్రివర్గం తీసుకున్న ఈ నిర్ణయం అస్సాంలో బాల్య వివాహాలను నిషేధించేందుకు సంబంధించి మరో కీలక ముందడుగుగా నిలవనుంది’’ అని ఆయన ఎక్స్‌లో పోస్టు చేశారు.