దేహానికి జింక్‌ అవసరమని నాణేలు, అయస్కాంతాలు మింగాడు

ఈటీవీ భారత్‌: ఆకలేస్తే ఎవరైనా అన్నమో, నచ్చిన ఇతర ఆహారమో తింటారు. దిల్లీకి చెందిన 26 ఏళ్ల యువకుడు ఏకంగా నాణేలు, అయస్కాంతం ముక్కలను తిన్నాడు. కడుపునొప్పితో ఇబ్బందిపడుతున్న అతణ్ని కుటుంబసభ్యులు సర్‌ గంగారాం ఆసుపత్రికి తరలించారు. పరీక్షలు చేసిన వైద్యులు రోగి పొట్టలో రెండు, అయిదు రూపాయల నాణేలు 39, వివిధ పరిమాణాల్లో ఉన్న 37 అయస్కాంతాలను గుర్తించి అవాక్కయ్యారు. శస్త్రచికిత్స చేసి వాటిని తొలగించినట్లు ల్యాప్రొస్కోపిక్‌ సర్జన్‌ తరుణ్‌ మిట్టల్‌ ఆధ్వర్యంలోని వైద్యబృందం తెలిపింది. ఏడు రోజులపాటు చికిత్స అందించాక డిశ్చార్జి చేసినట్లు డాక్టర్‌ తరుణ్‌ మిట్టల్‌ తెలిపారు. నాణేలు, అయస్కాంతాలు మింగడానికి యువకుడు చెప్పిన కారణం విన్న వైద్యులు విస్తుపోయారు. ‘‘శరీరానికి జింక్‌ అవసరమని ఎక్కడో చదివా. నాణేల్లో జింక్‌ ఉంటుందని, అది నా దేహాన్ని ధృడంగా ఉంచుతుందని మింగాను. నాణేలు శరీరం నుంచి బయటకు రాకుండా ఉండేందుకు అయస్కాంతాలు మింగాను’’ అని అతడు తెలిపాడు. యువకుడి మానసిక పరిస్థితిపై బంధువులు ఆందోళన వ్యక్తం చేస్తున్నారు.