వారసత్వానికి ఆరాటపడని ఎంజీఆర్‌: మోదీ

తిరుప్పూర్‌ (తమిళనాడు): విపక్ష కూటమిలోని పార్టీలు రాబోయే ఎన్నికల్లో ఓటమిని ముందే అంగీకరించాయని, అయినా తమిళనాడును దోచుకునేందుకు సిద్ధమైపోతున్నాయని ప్రధాని మోదీ విమర్శించారు. భాజపా తమిళనాడు రాష్ట్ర అధ్యక్షుడు కె.అన్నామలై రాష్ట్రవ్యాప్త యాత్ర ముగింపును పురస్కరించుకుని తిరుప్పూర్‌లో నిర్వహించిన సభలో ఆయన ప్రసంగించారు. యూపీయే పాలనలో కంటే గత పదేళ్లలోనే తమిళనాడుకు కేంద్రం నుంచి ఎక్కువ నిధులు వచ్చాయని చెప్పారు. తాను అందరి సంక్షేమం కోసం పనిచేసే వ్యక్తినన్నారు. ఇండియా కూటమి నేతలెవరూ ఎన్నడూ విద్య, అభివృద్ధి కోసం మాట్లాడరని, కేవలం తమ కుటుంబాల కోసమే తాపత్రయపడుతుంటారని విమర్శించారు. వారసత్వ రాజకీయాల కోసం దివంగత మాజీ సీఎం ఎం.జి.రామచంద్రన్‌ ఆరాటపడలేదని, డీఎంకే తీరు మాత్రం దీనికి భిన్నమని వ్యాఖ్యానించారు. ఎంజీఆర్‌ తర్వాత తన జీవితాన్ని ప్రజా సంక్షేమానికి అంకితం చేసిన నాయకురాలు జయలలిత మాత్రమేనని కొనియాడారు.