త్రిపురలో తెగల సమస్యల పరిష్కారానికి త్రైపాక్షిక ఒప్పందం

అమిత్‌ షా సమక్షంలో ఖరారు

దిల్లీ: త్రిపురలో వివిధ తెగల మధ్య ఉన్న విభేదాల పరిష్కారానికి టిప్రా మోథా, రాష్ట్ర ప్రభుత్వం, కేంద్ర ప్రభుత్వానికి మధ్య త్రైపాక్షిక ఒప్పందం కుదిరింది. కేంద్ర హోంమంత్రి అమిత్‌ షా సమక్షంలో శనివారం ఇక్కడ ఈ కార్యక్రమం జరిగింది. తాజా ఒప్పందంపై సంతకం ద్వారా ప్రభుత్వం చరిత్రను గౌరవించిందని, గతంలో జరిగిన తప్పులను సరిదిద్దిందని, ప్రస్తుత వాస్తవాన్ని ఆమోదించిందని అమిత్‌ షా ఈ సందర్భంగా తెలిపారు. ‘‘మీ హక్కుల కోసం మీరు ఎంతమాత్రం పోరాడాల్సిన అవసరం లేదు. కేంద్ర ప్రభుత్వం ఇందుకు అవసరమైన చర్యలను తీసుకుంటుంది’’ అని పేర్కొన్నారు. ఈ ఒప్పందం కింద స్థానిక తెగల మధ్య చరిత్ర, నేల, రాజకీయ హక్కులు, ఆర్థిక వృద్ధి, గుర్తింపు సంస్కృతి, భాషకు సంబంధించి నెలకొన్న అన్ని వివాదాలను సామరస్యంగా పరిష్కరించుకునేందుకు అంగీకారం కుదిరింది. దీనిపై ఒక సంయుక్త కార్యాచరణ కమిటీ కూడా ఏర్పాటవుతుంది.