టికెట్‌ రాలేదని ఆత్మహత్యాయత్నం చేసిన ఎంపీ కన్నుమూత

విల్లివాక్కం, కోయంబత్తూరు-న్యూస్‌టుడే: ఎన్నికల ముంగిట తమిళనాడులో విషాదం చోటుచేసుకుంది. టికెట్‌ దక్కలేదనే మనస్తాపంతో ఈ నెల 24న ఆత్మహత్యాయత్నం చేసిన ఈరోడ్‌ ఎంపీ, ఎండీఎంకే సీనియర్‌ నేత ఎ.గణేశమూర్తి(77) కోయంబత్తూరులోని ఆసుపత్రిలో చికిత్స పొందుతూ గురువారం చనిపోయారు. ఈసారి పార్టీ టికెట్‌ కేటాయించక పోవడంతో కుంగుబాటుకు గురైన ఆయన విషం తీసుకున్నారు. ఆయన్ను కాపాడేందుకు వైద్యులు శ్రమించినా ఫలితం లేకపోయింది. గణేశమూర్తి 1989లో ఎమ్మెల్యేగా, 1998, 2009, 2019లో ఎంపీగా గెలుపొందారు. నిషేధిత ఎల్టీటీఈకి మద్దతుగా మాట్లాడినందుకు పోటా కింద అరెస్టై జైలుకు వెళ్లారు.