ఈస్టర్‌ రోజున పనిదినం.. వెనక్కు తగ్గిన మణిపుర్‌ ప్రభుత్వం

ఇంఫాల్‌: ఈస్టర్‌ రోజును పనిదినంగా ప్రకటిస్తూ మణిపుర్‌ ప్రభుత్వం జారీ చేసిన ఆదేశాలను గురువారం వెనక్కు తీసుకుంది. ఆర్థిక సంవత్సరం చివరిరోజులు కావడంతో శని, ఆదివారాలు అయినప్పటికీ ఈ నెల 30, 31 తేదీల్లో అన్ని ప్రభుత్వ శాఖలు విధులు నిర్వహించాలంటూ బుధవారం రాష్ట్ర ప్రభుత్వం ఉత్తర్వులు జారీ చేసింది. ఇది కాస్తా రాష్ట్రంలో భారీ నిరసనలకు దారి తీసింది. ఈ ఆదేశాలతో క్రైస్తవుల మతపరమైన హక్కులకు భంగం వాటిల్లుతోందంటూ పలు సంఘాలు ప్రభుత్వ నిర్ణయాన్ని తీవ్రంగా ఖండించాయి. దీంతో దిగివచ్చిన సర్కార్‌ ఈస్టర్‌ రోజును సెలవుగా ప్రకటించింది. 30న అన్ని ప్రభుత్వ శాఖల్లో ఉద్యోగులు యథావిధిగా విధులు నిర్వహించాలని కోరింది.