సముద్రపు దొంగల ఆటకట్టించిన భారత్‌

23 మంది పాకిస్థానీయులను రక్షించిన నౌకాదళ సిబ్బంది

దిల్లీ: భారత నౌకాదళం మరోసారి సముద్రపు దొంగల ఆటకట్టించింది. అరేబియా సముద్రంలో హైజాక్‌కు గురైన ఇరాన్‌కు చెందిన చేపల పడవను రక్షించింది. 12 గంటల పాటు సాగిన ప్రత్యేక ఆపరేషన్‌ ద్వారా పడవలోని 23 మంది పాకిస్థానీ సిబ్బందిని సురక్షితంగా కాపాడినట్లు అధికారులు ప్రకటించారు. గల్ఫ్‌ ఆఫ్‌   ఎడెన్‌కు సమీపంలో ఉన్న సోకోట్రా ద్వీప సమూహానికి 90 నాటికల్‌ మైళ్ల దూరంలో గురువారం ఇరాన్‌కు చెందిన చేపల పడవ ‘కంబార్‌’ను తొమ్మిది మంది సముద్రపు దొంగలు ఆధీనంలోకి తీసుకున్నారు. రంగంలోకి దిగిన భారత నౌకాదళానికి చెందిన ఐఎన్‌ఎస్‌ సుమేధా ముందుగా కంబార్‌ను అడ్డుకుంది. ఐఎన్‌ఎస్‌ త్రిశూల్‌ సాయంతో దొంగలను అదుపులోకి తీసుకున్నట్లు అధికారులు తెలిపారు. అందులోని 9 మంది దొంగలను భారత్‌కు తీసుకొస్తున్నట్లు వెల్లడించారు.