కాంబోడియాలో చిక్కిన 250 మందిని కాపాడాం

విదేశీ వ్యవహారాల మంత్రిత్వ శాఖ

దిల్లీ: ఉపాధి అవకాశాల ఆశతో కాంబోడియాకు వెళ్లి, గత్యంతరం లేక బలవంతంగా సైబర్‌ నేరాల పనుల్లో చిక్కుకొన్న 250 మంది భారతీయులను ఇప్పటిదాకా సురక్షితంగా వెనక్కు తీసుకువచ్చినట్లు విదేశీ వ్యవహారాల మంత్రిత్వ శాఖ శనివారం ఒక ప్రకటనలో తెలిపింది. మీడియా కథనాల ఆధారంగా విషయాన్ని గ్రహించి, కాంబోడియా అధికారుల సహకారంతో ఈ కార్యక్రమం చేపట్టినట్లు వెల్లడించింది. కాంబోడియాలోని భారత రాయబార కార్యాలయానికి సైతం దీనిపై పలు ఫిర్యాదులు అందినట్లుగా విదేశీ వ్యవహారాల మంత్రిత్వ శాఖ అధికార ప్రతినిధి రణధీర్‌ జైస్వాల్‌ తెలిపారు. ఇటువంటి మోసాలకు గురికాకుండా అప్రమత్తంగా ఉండాలంటూ మంత్రిత్వ శాఖ తరఫున పలు సూచనలు కూడా జారీ చేశామన్నారు.