సంక్షిప్త వార్తలు (5)

సుప్రీంకోర్టులో సోరెన్‌ పిటిషన్‌ ఉపసంహరణ

దిల్లీ: అసెంబ్లీ బడ్జెట్‌ సమావేశాల్లో పాల్గొనేందుకు అనుమతి నిరాకరించిన హైకోర్టు ఆదేశాలను సర్వోన్నత న్యాయస్థానంలో సవాల్‌ చేసిన పిటిషన్‌ను ఝార్ఖండ్‌ మాజీ సీఎం హేమంత్‌ సోరెన్‌ సోమవారం వెెనక్కి తీసుకున్నారు. ఫిబ్రవరి 23న ప్రారంభమైన బడ్జెట్‌ సమావేశాలు మార్చి 2న ముగిశాయి. హైకోర్టు ఆయన అభ్యర్థనను ఫిబ్రవరి 28న నిరాకరించింది. బడ్జెట్‌ సమావేశాలు ఇప్పటికే ముగిసిపోయినందున పిటిషన్‌ను ఉపసంహరించుకునేందుకు అనుమతించాలని హేమంత్‌ తరఫు సీనియర్‌ న్యాయవాది కపిల్‌ సిబల్‌ సోమవారం విచారణ ప్రారంభమైన వెంటనే జస్టిస్‌ సూర్యకాంత్‌, జస్టిస్‌ కె.వి.విశ్వనాథన్‌ సభ్యులుగా ఉన్న ధర్మాసనానికి విజ్ఞప్తి చేశారు. అందుకు ధర్మాసనం సమ్మతించింది. మనీలాండరింగ్‌ కేసులో హేమంత్‌ సోరెన్‌ ప్రస్తుతం జ్యుడిషియల్‌ కస్టడీలో ఉన్నారు.

23 శునక జాతుల నిషేధంపైకేంద్రానికి దిల్లీ హైకోర్టు తాఖీదు

దిల్లీ: మనుషులపై దాడిని సాకుగా చూపుతూ 23 రకాల జాతుల శునకాలపై కేంద్ర ప్రభుత్వం నిషేధం విధించడాన్ని సవాల్‌ చేస్తూ దిల్లీ హైకోర్టులో పిటిషన్‌ దాఖలైంది. ఎలాంటి అధ్యయనం నిర్వహించకుండానే నిషేధించాలన్న నిర్ణయానికి రావడం పెంపుడు శునకాల వ్యాపారం చేస్తున్న, సంబంధిత వృత్తిలో నిమగ్నమైన వారి హక్కులను హరించడమేనని, రాజ్యాంగాన్ని ఉల్లంఘించడమేనని పిటిషనర్‌ ఆరోపించారు. ఈ కేసుపై సోమవారం విచారణ చేపట్టిన జస్టిస్‌ సుబ్రమణియం ప్రసాద్‌ కేంద్రానికి నోటీసు జారీ చేశారు. ఈ పిటిషన్‌పై ప్రభుత్వ వైఖరేమిటో తెలపాలని ఆదేశించారు. 23 రకాల శునక జాతుల పెంపకం, విక్రయాలను నిషేధించాలంటూ మార్చి 12న రాష్ట్రాలను కేంద్రం ఆదేశించింది.

రూ.21 వేల కోట్లు దాటిన రక్షణ ఎగుమతులు

దిల్లీ: భారత్‌ నుంచి రక్షణ రంగ ఎగుమతులు జీవనకాల గరిష్ఠానికి చేరుకున్నాయి. 2023-24 ఆర్థిక సంవత్సరంలో రూ.21,083 కోట్ల మేర రక్షణ ఉత్పత్తులు, సాంకేతికతలను విదేశాలకు సరఫరా చేసినట్లు రక్షణశాఖ మంత్రి రాజ్‌నాథ్‌ సింగ్‌ వెల్లడించారు. స్వతంత్ర భారత చరిత్రలో ఈ రంగంలో రూ.21 వేల కోట్ల మార్కును అధిగమించడం ఇదే తొలిసారని ‘ఎక్స్‌’ వేదికగా ప్రకటించారు. గత ఆర్థిక సంవత్సరంతో పోలిస్తే 32.5 శాతం వృద్ధి నమోదైందని తెలిపారు.

రైళ్లలో రాయితీల్లేక వృద్ధులపై నాలుగేళ్లలో రూ.5,875 కోట్ల భారం

 స.హ.చట్ట దరఖాస్తుతో వెల్లడి

దిల్లీ: రైళ్లలో ప్రయాణించే వయోవృద్ధులకు ఇచ్చే రాయితీలను ఎత్తివేయడంతో నాలుగేళ్లలో వారు రూ.5,875 కోట్ల అదనపు భారం మోయాల్సి వచ్చింది. ఆ మేరకు రైల్వేకు ఆదాయం పెరిగింది. మధ్యప్రదేశ్‌కు చెందిన స.హ.చట్ట ఉద్యమకారుడు చంద్రశేఖర్‌ గౌర్‌ చేసిన దరఖాస్తులకు సమాధానంగా రైల్వేశాఖ ఈ విషయాన్ని వెల్లడించింది. కరోనా లాక్‌డౌన్‌ తర్వాత 2020 మార్చి 20 నుంచి వయోవృద్ధుల రాయితీలను రైల్వే ఎత్తివేసింది. అంతకుముందు స్త్రీలకు 50%, పురుషులకు 40% తగ్గింపు లభించేది. 20.3.2020 నుంచి 31.1.2024 మధ్య 13 కోట్ల మంది వృద్ధులు, 9 కోట్ల మంది వృద్ధురాళ్లు, 33,700 మంది ట్రాన్స్‌జెండర్‌ వృద్ధులు రైళ్లలో ప్రయాణించి రూ.13,287 కోట్ల ఆదాయాన్ని సమకూర్చారు.

ఈసీ రాజ్యాంగ బాధ్యతను నిర్వర్తించాలి

కేంద్రంలోని భాజపా ప్రభుత్వం ఈడీ, సీబీఐ, ఐటీ విభాగాలను దుర్వినియోగం చేయకుండా అడ్డుకట్ట వేయడానికి మిగిలి ఉన్న ఏకైక ఆశాకిరణం ఎన్నికల సంఘం(ఈసీ). సార్వత్రిక ఎన్నికల తరుణంలో ఈసీ తన రాజ్యాంగ బాధ్యతను నిర్వర్తిస్తూ ప్రజాస్యామ్య విలువలను కాపాడే రక్షణ కవచంలా నిలవాలి. ప్రజాస్వామ్యం మనుగడలో ఉంటేనే ఈసీ గౌరవం, ప్రతిష్ఠ చెక్కుచెదరకుండా ఉంటాయి.

అఖిలేశ్‌ యాదవ్‌