కొత్త ప్రభుత్వం ఏర్పడ్డాక మరింత కష్టించి పనిచేయాలి

ఉన్నతాధికారులకు ప్రధాని మోదీ పిలుపు

ముంబయి: లోక్‌సభ ఎన్నికల తరవాత కొత్త ప్రభుత్వం కొలువుదీరిన మరుసటి రోజు నుంచే మరింత కష్టించి పనిచేసేందుకు ఉన్నతాధికారులంతా సిద్ధంగా ఉండాలని ప్రధాని మోదీ పిలుపునిచ్చారు. సార్వత్రిక ఎన్నికల తరవాత నూతన సర్కార్‌ ఏర్పాటుపై ధీమా వ్యక్తం చేస్తూ..ఆర్థికంగా దేశాన్ని మరింత స్వావలంబన దిశగా తీసుకెళ్లేందుకు కార్యాచరణను ప్రారంభిస్తామని మోదీ పేర్కొన్నారు. ‘‘ఇప్పుడు 100 రోజుల ఎన్నికల క్రతువులో తీరికలేకుండా ఉన్నాను. కొత్త సర్కార్‌ ప్రమాణస్వీకారం చేసిన తరవాత రోజు నుంచే ఎక్కువ పనిచేయడాన్ని ప్రారంభించాలి. ఈ విషయంపై మీరూ ఆలోచించండి. అందుకోసం మీకు తగిన సమయం ఉంది’’ అని రిజర్వు బ్యాంక్‌ 90వ వార్షికోత్సవ సందర్భంగా ఏర్పాటు చేసిన కార్యక్రమంలో మోదీ పేర్కొన్నారు.