విదేశీ వైద్య పట్టభద్రులకూ స్టైపెండ్‌ చెల్లించాల్సిందే

వైద్య కళాశాలలకు సుప్రీం స్పష్టీకరణ

దిల్లీ: మన దేశంలోని వైద్య కళాశాలల్లో ఎంబీబీఎస్‌ చదివిన వారితో సమానంగానే విదేశీ వైద్య పట్టభద్రులను చూడాలని, ఇంటర్న్‌షిప్‌లో స్టైపెండ్‌ చెల్లింపులోనూ వేర్వేరుగా పరిగణించరాదని సర్వోన్నత న్యాయస్థానం ఆదేశించింది. కొన్ని వైద్య కళాశాలల్లో విదేశీ వైద్య పట్టభద్రులకు ఇంటర్న్‌షిప్‌లో స్టైపెండ్‌ మంజూరు చేయడంలేదని ఓ వైద్యుల బృందం తరఫు న్యాయవాది తన్వీ దుబే... జస్టిస్‌ సుధాంశు ధూలియా, జస్టిస్‌ ప్రసన్న బాలచంద్ర సభ్యులుగా ఉన్న ధర్మాసనానికి తెలిపారు. విదేశీ వైద్య విద్యార్థులకు స్టైపెండ్‌ చెల్లించ నిరాకరించిన కళాశాలల వివరాలను తమకు అందజేయాలని జాతీయ వైద్య కమిషన్‌ (ఎన్‌ఎంసీ)ని ధర్మాసనం ఆదేశించింది. కోర్టు ఆదేశాలను ధిక్కరిస్తే చర్యలు తప్పవని హెచ్చరించింది.