ప్రామాణిక కార్యాచరణను వెల్లడించలేం

ఎన్నికల బాండ్ల విక్రయం, సొమ్ము చేసుకోవడంపై ఎస్‌బీఐ స్పష్టీకరణ

దిల్లీ: ఎన్నికల బాండ్ల విక్రయం, సొమ్ము చేసుకోవడానికి సంబంధించిన ప్రామాణిక కార్యాచరణ విధానాన్ని (ఎస్‌వోపీ) వెల్లడించలేమని స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) స్పష్టం చేసింది. ‘అది మా అంతర్గత మార్గదర్శకాల కిందకు వస్తుంది. వాణిజ్య, వ్యాపార రహస్యాలు, మేధోపరమైన సంపదకు సంబంధించిన సమాచారాన్ని వెల్లడించకుండా చట్టంలో మినహాయింపులు ఉన్నాయి’ అని పేర్కొంది. ఎన్నికల బాండ్ల విక్రయాలు, సొమ్ము చేసుకోవడానికి సంబంధించి తమ అధీకృత శాఖలకు ఎస్‌బీఐ జారీ చేసిన ఎస్‌వోపీ వివరాలను చెప్పాలంటూ సామాజిక కార్యకర్త అంజలీ భరద్వాజ్‌ సహ చట్టం కింద దరఖాస్తు చేశారు. దీనిపై ఎస్‌బీఐ సమాధానమిచ్చింది. దీనిపై అంజలీ భరద్వాజ్‌ అసంతృప్తి వ్యక్తం చేశారు. ‘ఎన్నికల బాండ్లను రాజ్యాంగ విరుద్ధమని చెప్పిన సుప్రీంకోర్టు.. వాటికి సంబంధించిన అన్ని వివరాలనూ బయటపెట్టాలని ఆదేశించింది. అయినప్పటికీ ఎస్‌బీఐ కీలక సమాచారాన్ని పంచుకునేందుకు నిరాకరిస్తోంది’ అని ఆరోపించారు. ఈ ఎస్‌వోపీతో ఎన్నికల బాండ్ల విక్రయం, సొమ్ము చేసుకోవడంపై బ్యాంకు ఎలాంటి ఆదేశాలు జారీ చేసిందన్న వివరాలు బయటికొస్తాయని పేర్కొన్నారు.