న్యాయవాదుల ప్యానళ్ల మార్పుతో కోర్టుల విధులకు భంగం కలగనివ్వొద్దు

రాష్ట్రాలకు సర్వోన్నత న్యాయస్థానం సూచన

దిల్లీ: రాష్ట్రాల్లో అధికారం చేతులు మారినప్పుడల్లా కొత్త ప్రభుత్వాలు న్యాయవాదుల ప్యానళ్లలో మార్పులు చేయడం సహజమేనని, ఆ అధికారం వాటికి ఉందని సుప్రీంకోర్టు తెలిపింది. అయితే, న్యాయస్థానాల విధులకు ఆటంకం కలగని విధంగా ఆ మార్పులుండాలని జస్టిస్‌ అభయ్‌ ఎస్‌.ఓక్‌, జస్టిస్‌ ఉజ్జల్‌ భుయాన్‌తో కూడిన ధర్మాసనం మంగళవారం రాష్ట్రాలు, కేంద్ర పాలిత ప్రాంతాలకు సూచించింది. కొత్త న్యాయవాదుల ప్యానళ్లు వచ్చిన ప్రతిసారి ఆ కారణంతో ఆయా రాష్ట్ర ప్రభుత్వాలకు చెందిన కేసుల్లో వాయిదాలు కోరడం పరిపాటి అవుతోందని పేర్కొంది. కనుక పాత ప్యానళ్లను కనీసం ఆరు వారాల పాటైనా కొనసాగిస్తే...విచారణలను తప్పనిసరిగా వాయిదా వేయాల్సిన పరిస్థితిని కొంత వరకైనా నివారించవచ్చని ఓ కేసు విచారణ సందర్భంగా ధర్మాసనం అభిప్రాయపడింది.