‘ఇండియా’ పేరుపై స్పందించండి

కేంద్రం, ప్రతిపక్షాలకు దిల్లీ హైకోర్టు ఆదేశం

దిల్లీ: విపక్షాల కూటమికి ‘ఇండియా’ అని పేరు పెట్టడాన్ని సవాల్‌ చేస్తూ దాఖలైన పిటిషన్‌పై వారం రోజుల్లో తమ స్పందనలను తెలియజేయాలని ఆదేశిస్తూ కేంద్రానికి, ప్రతిపక్షాలకు దిల్లీ హైకోర్టు చివరి అవకాశం ఇచ్చింది. ఈ మేరకు హైకోర్టు తాత్కాలిక ప్రధాన న్యాయమూర్తి జస్టిస్‌ మన్మోహన్‌, జస్టిస్‌ మన్‌మీత్‌ ప్రీతమ్‌ సింగ్‌ అరోడాల ధర్మాసనం మంగళవారం పేర్కొంది. ఎన్నికలున్న నేపథ్యంలో ఈ కేసులో ముందస్తు విచారణ చేపట్టాలన్న అభ్యర్థనను తిరస్కరించిన హైకోర్టు.. ఈ నెల 10న వాదనలు వింటామని స్పష్టం చేసింది. కేంద్రానికి, ప్రతిపక్షాలకు ఇప్పటికే ఎనిమిది అవకాశాలనిచ్చామని, కానీ వారు తమ స్పందనలు తెలియజేయలేదని పిటిషనర్‌ తరఫు న్యాయవాది వైభవ్‌ సింగ్‌ హైకోర్టుకు విన్నవించారు. ఈ పిటిషన్‌పై ప్రాథమిక అభ్యంతరాలున్నాయని, సుప్రీంకోర్టు ఇప్పటికే దీనిపై విచారించిందని ప్రతిపక్షాల తరఫు సీనియర్‌ న్యాయవాది అభిషేక్‌ సింఘ్వీ తెలిపారు. లోక్‌సభ ఎన్నికల్లో భాజపాను ఉమ్మడిగా ఎదుర్కోవాలనే వ్యూహంతో విపక్ష రాజకీయ పార్టీలు ‘ఇండియా’ కూటమిగా ఏర్పడిన విషయం తెలిసిందే. అయితే ఆ పార్టీలు తమ రాజకీయ ప్రయోజనాల కోసం దేశం పేరును ఉపయోగించుకుంటున్నాయని దిల్లీ హైకోర్టులో ప్రజా ప్రయోజన వ్యాజ్యం దాఖలైంది. ఆ కూటమి ‘ఇండియా’ పేరును ఉపయోగించకుండా మధ్యంతర ఉత్తర్వులు జారీ చేయాలని న్యాయస్థానాన్ని కోరారు.