మాజీ భర్తకు భరణం చెల్లించండి

ఓ మహిళకు బాంబే హైకోర్టు ఆదేశం

ముంబయి: అనారోగ్యం కారణంగా సంపాదించలేని ఓ వ్యక్తికి అతని మాజీ భార్య నెలకు రూ.10 వేల చొప్పున భరణం చెల్లించాలని బాంబే హైకోర్టు ఆదేశించింది. అనారోగ్యం, వైద్యపరమైన ఇబ్బందుల కారణంగా ఆ వ్యక్తి జీవనోపాధి పొందే స్థితిలో లేరని, హిందూ వివాహ చట్టంలోని సెక్షన్‌ 24 ప్రకారం ఇలాంటి పరిస్థితుల్లో ఉన్నవారికి ఆదాయ వనరు ఉన్న జీవిత భాగస్వామి(స్పౌస్‌) మధ్యంతర భరణం చెల్లించాలని హైకోర్టు పేర్కొంది. దీని ప్రకారం బ్యాంకు మేనేజరుగా పనిచేస్తున్న ఆ మహిళ తన మాజీ భర్తకు రూ.10వేలు భరణం చెల్లించాలని ఆదేశించింది. ఈ మేరకు అంతకుముందు సివిల్‌కోర్టు ఇచ్చిన తీర్పును సమర్థించిన హైకోర్టు దాన్ని సవాల్‌ చేస్తూ ఆ మహిళ వేసిన పిటిషన్‌ను కొట్టివేసింది.