ఉగ్రవాదులకు నిబంధనలు పట్టవు

వారికి బదులివ్వడంలోనూ నిబంధనలు ఉండవు: జైశంకర్‌

పుణె: గత పదేళ్లలో దేశ విదేశాంగ విధానంలో గణనీయమైన మార్పు వచ్చిందని విదేశీ వ్యవహారాల శాఖ మంత్రి ఎస్‌.జైశంకర్‌ అన్నారు. ఉగ్రవాదాన్ని ఎదుర్కొనేందుకు ఈ మార్పే సరైన విధానమని తెలిపారు. ముష్కరులు ఎలాంటి నిబంధనలు పెట్టుకుని దాడులు చేయరని, అలాంటప్పుడు వారికి బదులివ్వడంలోనూ ఎలాంటి నిబంధనలు ఉండాల్సిన అవసరం లేదని ఆయన అభిప్రాయపడ్డారు. మహారాష్ట్రలోని పుణెలో జరిగిన ఓ కార్యక్రమంలో జైశంకర్‌ పాల్గొన్నారు. ఉగ్రవాద ముప్పు, దేశ దౌత్య సంబంధాలు తదితర అంశాలపై యువత అడిగిన ప్రశ్నలకు బదులిచ్చారు. ఏయే దేశాలతో సంబంధాలు కొనసాగించడం కష్టంగా ఉందని అడగ్గా.. పొరుగున ఉన్న పాకిస్థాన్‌ అని ఆయన పేర్కొన్నారు. ఉగ్రవాదాన్ని ఎట్టి పరిస్థితుల్లోనూ ఆమోదించేది లేదని దాయాది దేశాన్ని ఉద్దేశిస్తూ స్పష్టంచేశారు.