మణిపుర్‌లో ఆయుధ సేకరణ పెట్టెలు

దోపిడీ చేసిన తుపాకులను వాటిలో వేయాలంటున్న ప్రభుత్వం

ఇంఫాల్‌; చురాచాంద్‌పుర్‌: మణిపుర్‌లోని పలు ప్రాంతాల్లో ప్రభుత్వం ఏర్పాటు చేసిన పెట్టెలు ప్రత్యేకతను సంతరించుకున్నాయి. రాష్ట్రంలో జాతుల మధ్య వైరం నెలకొన్న సమయంలో ఎత్తుకెళ్లిన ప్రభుత్వానికి చెందిన ఆయుధాలను ఆ పెట్టెల్లో వదిలిపెట్టాలంటూ అధికారులు ప్రజలకు విజ్ఞప్తి చేస్తున్నారు. లోక్‌సభ ఎన్నికల నేపథ్యంలో ఆ ఆయుధాలు పౌరుల వద్ద ఉంటే ప్రమాదకరమని ప్రభుత్వం భావిస్తోంది. ఈ క్రమంలో వాటిని సేకరించాలని, అదే సమయంలో ఆ వ్యక్తుల గుర్తింపు బయటపడకుండా ఉండేందుకు ఈ ఆయుధ సేకరణ పెట్టెలను ఏర్పాటు చేసింది. వాటిపై ‘సాయుధ దళాల వద్ద దోచుకున్న ఆయుధాలను దయచేసి ఈ పెట్టెల్లో వేయండి’ అన్న సందేశాలను ఉంచింది. దోపిడీకి గురైన ఆయుధాల్లో ఇంకా  4,200 ఆయుధాలు ప్రజల వద్దే ఉన్నాయని అధికార వర్గాల అంచనా. ఇంఫాల్‌ తూర్పు నియోజకవర్గ భాజపా ఎమ్మెల్యే ఇంటి వద్ద కూడా కూడా ఆయుధ సేకరణ పెట్టెను ఏర్పాటు చేయడం గమనార్హం.